ZKIZ Archives


港人看2013

2013-01-24  NM
 
 

 

名人鄺美雲珠寶店老闆13年股市會好好,睇唔到有咩理由會跌。我嘅珠寶生意有升無跌,客人消費能力愈嚟愈高。如果個市唔好,佢哋都無心機買嘢啦!樓價唔會跌,全世界都睇到香港係一塊福地,所以就算政府咁多措施,仲好多人買樓。我建議大家買珠寶,戴住唔單止靚,黃金鑽石翡翠都仲會升值!林本利活道教育中心校監

今年我睇好股市多過樓市。○七年中原樓價指數係五十點,依家係一百一十五點,足足升咗一倍,加上政府好有決心遏抑樓價,跌嘅機會遠遠大過升,仲投資樓市好戇居。相反,恒指只係○七年高位嘅六成,市盈率不足十一倍,仲係好平。中、美經濟開始好轉,利好港股表現,尤其係H股。

涂謹申立法會議員

美國財政懸崖表面搞掂,但係睇指數都無乜改善,歐洲仍然係差,加上做議員有好多規定,我揸住啲現金咩都唔敢買,之前都有買吓黃金,但係依家金都唔保值喇!

黎智英壹傳媒(282)主席

小心小心!出年係動盪嘅一年,歐洲和美國有太多未知數,中國又可能改革,太多事件可以發生,所以都係保守啲好!

詹培忠前立法會議員

依家個市好似幾好,但香港俾鬼佬基金操控住,咪又係塘水滾塘魚!仲有,香港靠晒服務性行業,但啲鋪租咁貴,你估生意咁易做呀?香港地,你以為好好賺,最後咪又係一鋪清袋,你估啲基金佬、猶太佬會俾你咁輕鬆咩?

黃士心康泰旅行社董事長

剛過去嘅聖誕同嚟緊嘅新年,香港人都捨得使錢報啲貴價團,順住舊年個勢頭,今年香港旅遊業環境應該幾好!今年六月郵輪碼頭會開,會吸引好多遊客來玩。生意好一定會加人工,不過呢樣你要問我個仔!

白領 / 專業人士古先生建築公司職員

股市已經升咗好多,恒指今年最多去到二萬五點。財政懸崖好似解決咗,但美國經濟未恢復,仲有好多問題。大陸雖然換咗領導人,但係政治差、貪污嚴重,一定會拖垮經濟。

蘇小姐金融界

個市唔係幾好,之前有投資股票及外幣,但回報唔得。有買人民幣,因為十八大過後,中國發展會較平穩。今年暫時唔會入市,太多唔穩定因素,歐債、美國財政懸崖都未解決。如果樓價跌三成左右,希望可以買樓,依家太貴了。

施小姐文員

舊年經濟唔好,好多公司裁員,無得加人工,OT無錢補,樣樣都要cut,好似搭的士無得Claim,紙、文件夾訂少點。通脹好勁,唯有慳,唔搭的士搭巴士,以前食五十蚊套餐,依家就去大家樂、米線鋪。今年前景唔樂觀,裁員潮會繼續,希望保得住份工。

鍾女士律師樓秘書

今年股市應該幾好,尤其睇好中國通訊板塊,佢地業績會好,因為中國愈來愈多人用手機,最鍾意中移動,大藍籌,市場佔有率高,一百個中國人有一個用緊中移動。依家樓價仲癲過九七,想買樓,但買唔起,希望等佢回落少少再入市。

陳先生記者

屋企人曾經喺股市賴嘢,自己都唔敢試,但工作關係會睇住個大環境。香港股市一定死梗,因為外國的需求減少,大陸無可能年年過八(GDP增長),實會爆煲。樓市年年都話冧,但咁多年都未真係跌過,傻佬都唔會入市,睇吓政府增加土地供應會唔會推冧個市啦。

中小企周國強順安汽車貿易有限公司老闆(的士車行)

今年香港經濟一定係穩健,愈嚟愈多自由行,熱錢又湧到香港,恒指可能去到二萬七千至八千點,到時大家賺到錢,都會搭多幾轉的士。我哋希望今年可以加價百分之十,起錶價加到廿二蚊,跳錶加一毫。政府出招後,少咗人買樓,銀行啲錢借唔出,按揭利息平咗好多,如果大家有閒錢,可以買的士牌,二百幾萬,三成按揭,每個月收租,好過攞幾百萬去買樓。

潘權輝安記海味董事總經理

舊年股市麻麻,市民使錢無咁豪爽,最近股市大升,客人可能會買多點海味過年。舊年中國海關收緊執行帶海味入口嘅法例,一超額就沒收,搞到啲內地客唔敢多買。照我話,內地海關應成立一個特別徵稅中心,俾超額嘅客人補稅,咁我哋有生意做,佢地又有稅收。

Andy埃及酒吧老闆

我喺蘭桂坊有兩間酒吧,經營愈來愈難。地產商加租,開天索價,你不做,好多人搶來做。我間鋪兩年來已加咗兩成半租,依家月租四十五萬,今年又要傾租約,都唔知點算。做酒吧主要靠居港外國人,或大型國際展覽帶來嘅外國客,政府應該做多啲國際展覽,唔好以為放多啲自由行來就可以打救香港。

楊素霞日本時裝店Velvet老闆

我對2013年好樂觀,睇新聞亦唔見有話裁員減人工嘅負面消息。買衫好睇心情,經濟好,大家都捨得買衫。舊年銀行立立亂,又話要裁員,真係有客人話唔敢買衫o架!近期日圓大跌,係入貨好時機,成本至少低一成。今年希望可以由現時四百呎鋪位,搬到超過一千呎的樓上鋪。

陳錦輝永富食品有限公司董事

舊年內地客減少咗,生意跌咗一兩成,佢哋佔咗六成生意,買一轉就使幾千蚊。我哋特有的方形西瓜,幾百蚊一個,有內地客一次過買成一百個運返內地。今年內地局勢穩定後,生意額應該會升番,但同時亦面對租金問題,早前上環分店因為租金由五萬加到十三萬,做唔住而執咗。

家庭主婦黃小姐

我喺出口貿易公司做,月薪三萬幾,去年經濟差,公司生意跌咗三成,今年都唔會好得去邊。去年中,用三百幾萬在九龍灣買咗層樓,八成五按揭,供廿五年。依家通脹咁高,加上囡囡剛出世,買嘢要好似阿婆咁計住,以前用五、六十蚊買一條魚,而家會買十蚊一條。希望梁振英唔好搞樓市,我好驚樓價跌,變咗負資產,供唔起樓。

楊小姐

早幾年唔想俾層樓綁死,所以無買樓,依家好後悔。我同老公、囡囡租住愉景新城,月租萬五,租約到明年四月,加租都無得擔心,樓價唔會跌,居屋又唔合資格。人民幣不停升,港紙貶值,通脹好厲害,13年都唔會有咩變化。過往星期六、日會一家人出街食飯,依家就大時大節先會出去食。加人工?唔減都偷笑啦,我都係因為舊公司減得太多先要轉工。

陸女士

我鍾意買樓投資,有幾個單位喺手,主要係港島區啲二手樓、細單位,用來自住同收租。新樓折舊快,實用面積細,計埋呎價仲貴過九七年,叫班後生點上車?唯有租屋住,所以我啲樓都係租俾後生仔。舊年樓價太高無入市,今年都唔會,歐美外圍環境唔好,梁振英政府搞到一團糟,唔少朋友都話準備移民,所以睇淡個市。

郭太

我間公司已經兩年無加過人工,今年都唔知有無花紅,公司只會叫你同佢一齊捱!我今日特登喺青衣出嚟荃灣買餸,多啲鋪頭方便格價,一次過買一星期嘅餸,又會再平啲。

大學生陳裕榮港大教育學士

雖然話出生率低,好多小學都面臨殺校危機,但最差幾年已經過去,反而中學面對收生減少,加上推行三三四學制後,少咗一個學年,有啲學校已要裁員。對於搵工,我有點擔心,因為好多都要求有工作經驗,所以我大學二年級就開始到學校做實習老師,增加經驗。

龔伊琳中大生物化學系

如果做返我讀嗰行,預算月入都係萬一、萬二蚊,而且好難先有機會升職,所以我報咗名考AO、EO,人工高、福利好。對紀律部隊都有興趣,如警察、海關及入境處,佢地每年都會請好多人,入到嘅機會大好多!

李明燊中大系統工程與工程管理學系

每間公司都要人識IT,做APPS嘅公司又興起,工作機會較多,我寄咗幾份CV,等緊回覆,人工由一萬到萬五不等。我係澳門人,一畢業就無宿舍住,出去租屋連埋水電都要成六千,無一萬蚊人工真係生活唔到。打工仔發唔到達,亦無可能買樓,希望第時可以創業!

譚逸聰港大測量系

香港有好多基建同地產工程進行緊,我呢一行年年都請人,就業率可以話係100﹪。我報咗測量界四間大行嘅入職試,首選係世邦魏理仕(CRBE)。四大行嘅起薪點大約係一萬八千蚊,通過專業試成為認可測量師,人工會升一倍。內地、澳門都有好多基建工程,佢哋對香港測量師嘅需求好大,人工甚至比香港高,有機會都會試。

 
PermaLink: https://articles.zkiz.com/?id=43164

Next Page

ZKIZ Archives @ 2019