渣打銀行一位前線職員（teller）偷取客戶存款二百二十萬元，分幾次進行，最後一次在2011年9月4日被渣打捉個正著，在法庭認罪，但法官感到震驚噃？點解，因為法官Frankie Yiu Fun-che，在庭上得悉呢位黃姓職員曾有前科，在恆生銀行任職時（2004-07），因偷取客戶八十六萬元，曾坐監兩年，2010年出獄，半年後就到渣打返工，法官要求檢控官提供呢位職員之全部犯罪紀錄，一月二十三日先至判刑。
以前左丁山做銀行，知道任何人莫講有刑事案底，坐過監，即使係上過廉署協助調查一次咁多，廉署冇起訴佢，銀行都唔會僱用，點解渣打銀行會聘用坐過兩年監之人呢？唔通真係人手緊張到極，teller好難搵，還是事先毫不知情，人力資源部瞌曬眼瞓？以此相問一位人力資源經理，佢嘆一口氣講：「自從有咗私隱條例，我地請人，有好多嘢唔問得，邊度有人會自動申報坐過監，犯過法呢類嘢㗎，假如人力顧問公司（薦人館）叫求職者上嚟，佢又帶齊學歷證件正本俾我地睇之後，只能問嚇佢嘅工作經驗，對答口才，頂多再加上考一次中英文試，樣樣冇問題，就可以聘請嘅嘞，家庭事唔准問，個人私事唔准問，總之請到一個賊嘅話，算你唔好彩！不過，按道理渣打可以要求以前僱主俾資料，唔知有冇問。」
聽前輩講過，1950年代入銀行甚難，銀行會要求提供「鋪保」，今日睇番轉頭，似是天方夜譚。既有新形勢、新規則，我地做銀行客戶，就唔好貪方便，幾大都要麻煩銀行，譬如收到信件一問：「為了環保，本銀行提供電郵月結單給你選擇。」左丁山一定填回答覆：No，我要收紙印月結單，每個月對一次，睇電郵好易唔記得嘅啫，上述渣打職員就係揀兩個不需要月結單嘅戶口埋手，知道較容易遮瞞。睇電郵固然方便，省紙張算係環保，銀行就最得益，因為慳埋紙張及郵費，但銀行存戶啲錢係我嘅噃，對我嚟講，保護戶口安全不被內鬼睇中，最為重要，月結單不可或無！有位老友話要尊重人權，給予出獄監犯一個自新重新投入社會嘅機會，不應歧視之，老友講得好啱，但係私隱條例不應過份保護呢類人，僱主都要有知情權嘅啫！
（按：讀者Thomas來函指正，美國payroll tax在2009年刺激經濟方案削減2%（百分之二），與小布殊減稅無關。） 