| ||||||
魔童王維基開拍重口味劇集，但拍攝手法出位惹人爭議；當中的《三面形醫》更玩到真人整容割雙眼皮，開電視史先河，全程目擊的林文龍，睇到心驚肉跳。重投香港電視圈，林文龍今次亦搏到盡，拍火燒身場面，親身上陣唔錫身。 割雙眼皮 香港電視申請免費電視牌，日前無綫申請司法覆核，企圖阻截魔童開台大計。不過你有你出招，王維基繼續以每集揼過百萬開劇。落重本更落重口味！靈異劇集玩食內臟、斬人頭；林文龍、姜大偉和艾威孭飛的《三面形醫》更直接真人割雙眼皮，將整個手術過程搬上熒幕，創電視劇先河；飾演整容醫生的林文龍雖然無法親自動手，但全程 參與。「拍攝當日，我哋要全身消毒才入手術室，基本上手術要做三粒鐘，計埋我哋拍嘢，喺手術室嘅時間差不多十幾個鐘。我現場直擊成個過程，睇完更加唔明白女人點解肯受啲咁嘅罪。」林文龍說。 背部着火 日前林文龍在元朗大棠荔枝園為該劇拍山林大火殺科戲，劇組於現場準備了多罐石油氣製造火場外，還有大型水車在旁戒備以防意外。女細老婆嫩，林文龍冇有怕，親身上陣拍攝背部着火場面，即使只是他孭住的背囊着火，但火勢頗大，一cut機，工作人員第一時間撲上前滅火。之後拍大火燒身戲，劇組為安全計，堅持由替身上陣。「今次拍劇休息時間俾得好足，籌備時間亦比以前拍無綫劇多一倍；未正式拍之前，仲要跟專業醫生上堂，學打針學揸刀，花好多時間做準備功夫。」林文龍說。 加碼合作 離開無綫北上拍劇多年的林文龍，今次回流返港拍劇，他承認價錢吸引是其中一個因素。「雖然唔及返大陸拍搵得多，但價錢都好接近，加上留喺香港拍劇可以多點時間陪個女，有番啲家庭生活。」有好開始，林文龍表示下半年會與香港電視再合作，暫停北上；而老婆郭可盈想專心湊女，只會間中出騷賺輕鬆錢。雖然發牌仍存變數，但王維基已準備好數百小時節目，為開台作好 準備。「老闆話如果三月前發到牌，今年下半年，香港電視已經可以啟播。」知情者說。 重炮待命 魔童玩重口味吸引觀眾，無綫不甘後人，拍劇亦以綽頭行先，咬實唔放冇蝕底外，亦落重兵搵外援，嚴陣以待，唔敢 輕敵。 《衝上雲霄2》 出動外援吳鎮宇、張智霖的《衝上雲霄2》，遠赴英、法等地拍攝，雖然拍攝以來是非多多，靚人靚景，有一定吸引力。 《金枝慾孽（貳）》 金牌監製戚其義和金牌編劇周旭明告別無綫之作，陳豪、鄧萃雯和蔡少芬孭飛，繼續玩後宮權鬥搶師奶。 《男歡女愛2》 黃子華四月重返無綫拍劇，傳將與老拍檔鄭裕玲再度合作拍《男歡女愛2》，希望再創五十點收視神話。 | ||||||