前 日筆者在本欄談到「輕資產經營模式」(Asset-light Business Model),美國體育用品的霸主Nike當年便憑這模式經營,是其成功因素之一。當年Nike以「輕資產經營」模式,將需要較大資本的工序──產品製造 外判給第三者代勞,亦將零售分銷業務外判,自己則集中產品設計、開發、研究及市場推廣方面,因而改變了美國體育用品業的傳統經營模式,尤其是運動明星代言 人之重要。當年筆者在美加讀書時,正值Nike由一間平平的公司開始起步,當年著名籃球運動員Michael Jordan為Nike的代言人,Nike推出了一系列的Air Jordan鞋款,成為銷量最高的籃球鞋之一。當時,Michael Jordan這明星招牌,可謂是Nike踏上美國藍籌股及成功的重要元素之一。仍記得當年討論Michael Jordan如何為Nike代言人,及其退休復出、再退休,正是當時不少美加學生們的熱門話題。
Nike 1蚊變70蚊
當年 (大約1989年),Nike的股價不足一美元(經拆細及股息之調整),多年間輾轉上升,上月一度升至70美元高位。即一萬美元變70萬美元、10萬美元 變700萬!假若筆者將當年買Nike波鞋的錢,改為買Nike股份,相信回報頗為可觀,試想20年回報達70倍,肯定不是這麼多股份可做到。故筆者一向 不會小覷波鞋股,因為分分鐘可能找到隻明日的Nike!在一眾運動用品股份中,筆者較留意李寧(2331)及安踏(2020),它們在內地的體育用品市場 佔有率龐大,僅次於Nike及adidas。同時,李寧及安踏在國內的分銷網絡也頗為龐大,李寧有5000多個分銷點,安踏則有4700多個,兩者規模相 若。此外,李寧主打中檔市場,安踏則主攻低檔市場。
李寧安踏揀邊隻?
筆者察覺安踏及李寧的股東回報(ROE)也頗強勁,在 2007年,李寧的ROE為30.1%;安踏則為24.5%(註:扣除淨現金因素,安踏的ROE將會較逼近李寧的ROE)。同時,兩者亦處於淨現金情況, 沒有龐大負債。兩者之中,筆者較看好李寧,反正近日股市下挫,不妨靜候其估值跌至較合理水平,才慢慢吸納,不用心急追貨,筆者的目標吸納入貨位,仍未到。 前日(周二)筆者send了多張「危險」訊號的圖表給一些好友,提醒他們獲利回吐,某些時候技術分析也有其獨到的用處!不知C君看罷「丁雀」 (Danger)後有否回吐?作者譚紹興為證監會持牌人士電郵:[email protected]
中環在線:奧運火炬燒旺李寧股價 李華華 2008-08-12 AppleDaily 昔 日「體操王子」李寧,喺京奧開幕禮上做最後一棒火炬手,佢嘅飛簷走壁技驚四座,除咗令大家對中年李寧嘅體能刮目相看,呢次燃點奧運火炬,仲燒旺埋佢公司嘅 股價。李寧(2331)噚日嘅股價好似北京鳥巢支奧運火炬咁,燒到烘烘聲,最高升咗1.04蚊或6%,收市報18.24蚊,全日升3.5%,遠遠拋離5隻 同類體育用品股。李寧喺體壇上金牌就攞得多,今次可以話喺股場上奪金。查實開幕當日已傳出話最後火炬手係李寧,李寧嘅股價上個禮拜五已經偷步升咗 3.7%,咁又係嘅,話晒奧運開幕係全球直播,李寧做最後一棒火炬手,對佢嘅公司進軍海外市場有好大幫助,淨係廣告費都慳唔少啦。不過,同人唔同命,搵咗 謝霆鋒做代言人嘅特步國際(1368),雖然霆鋒有份喺奧運開幕禮獻唱,但對公司股價一啲幫助都冇,噚日插水逾兩成,成為5隻體育用品股跳水之冠。
京奧概念股分出贏輸家 中環在線:李寧一點成名股價升 李華華2008-08-25 AppleDaily 北京奧運噚日閉幕,今屆全球有200幾個國家同地區進行報道同轉播,規模係悉尼奧運嘅4倍、雅典奧運嘅3倍。咁多人睇,最高興當然係贊助商,係時候睇吓邊個係大贏家。 最 大贏家梗係李寧公司(2331)。奧運開幕禮重頭戲,由體操王子李寧手持聖火,凌空繞場一周點主火炬塔,將開幕禮推向高潮,李寧一時之間俾全球12億觀眾 認識。李寧股價亦由奧運開幕前(8號)嘅17.62蚊,升到上個禮拜四(21號)18.6蚊,升5.6%,相對同期恒生指數跌6.8%,遠遠跑贏大市。 聯想5億做頂級贊助商 另 一隻概念股聯想(992),係京奧全球合作夥伴中唯一嘅中國企業,直接啲講即係頂級贊助商。新華網報道,頂級贊助商每家至少要畀6500萬美金(即係超過 5億港銀)先有資格做,加埋推廣產品同宣傳嘅開支,條數要再多幾倍甚至十倍以上。至於宣傳實效係點,仲要拭目以待。至於中行(3988)、中移動 (941)等做合作夥伴,入場費都要近3億人仔;海爾電器(1169)母公司海爾集團同青島啤酒(168)就做贊助商,起步價1.3億人仔。使咗咁多錢, 都係想建立國際形象,但宣傳效用始終好難量化,有上市公司嘅收入直接受惠。服裝製造商申洲國際(2313),上半年喺大陸運動服業務收入就急增1.7倍至 9.53億銀。主席馬建榮話,國家籃球隊喺京奧表現佳,對青少年有相當影響,相信奧運後繼續有利運動服市場。神州數碼(861)總經理劉宇清話,奧運前部 份電訊同銀行客戶為確保電腦系統安全運行,加強軟件服務需求,所以令收入多咗。電郵: [email protected]
中環在線:李寧辦學唔及做生意 李華華 2008-09-10 AppleDaily 李寧退出體壇後,除咗創辦運動衫品牌李寧(2331),仲喺廣東佛山開咗間李寧體操學校,今年已經踏入十周年。 每年至少補貼150萬 體 操王子開體操學校,應該有好多慕名而嚟嘅學生,不過,講到搵錢,間學校就唔及上市公司李寧嘞。據內地《贏周刊》報道,李寧體操學校每年到咗8月,都要度好 下一年嘅財務計劃交畀上市公司李寧嘅董事會,過去,董事會每年都要補貼150萬至200萬人仔。雖然話上市公司李寧自90年創立以嚟,越做越大,04年仲 喺香港上市,之後每年盈利都億億聲,07年度賺4.74億人仔,大升六成,百零萬呢啲小數目,濕濕碎啦。不過,長貧難顧,唔通做教育事業真係難過做生意? 不過,相信李寧開呢家體操學校,都只係想培育更多「體操王子」,錢賺唔賺到並唔重要。
中環在線:韓國股神靠李寧翻身 李華華 2008-11-10 AppleDaily 被稱為韓國股神的朴炫柱,旗下基金Mirae Asset投資港股,之前買入蒙牛(2319),點知毒奶事件令蒙牛股價一沉百踩。不過,韓國股神冇有怕,繼續喺港股尋寶,今次押注前體操王子李寧。 港交所(388)資料顯示,Mirae Asset喺上個禮拜二,以每股11.28蚊,增持117萬股李寧(2331),涉及金額1320萬銀,以李寧上個禮拜五收報12.14蚊計,暫時賬面微賺百零萬。 蒙牛累損手 韓 國股神今年7月掃咗110.8萬股蒙牛,每股23蚊。到9月蒙牛得番8.36蚊時,佢賣咗1852.8萬股止蝕,單睇7月時入嗰110.8萬股,朴炫柱就 唔見咗1622萬銀。除咗俾蒙牛累,韓國股神亦陸續沽咗啲中國南車(1766)、招行(3968)同招金礦業(1818)。至於李寧係咪可以幫佢翻身,就 唔知咯。
中環在線:李寧派息幫補韓國股神 李華華 2008-11-20 AppleDaily
金 融海嘯加上蒙牛(2319)毒奶事件,有韓國股神稱號嘅朴炫柱被迫「賣牛」換馬。本月4日,透過旗下基金Mirae Asset用咗大約1320萬銀,掃入117萬股李寧(2331),持股量去到5.04%,希望博翻身,估唔到佢咁快有回報!禮拜一李寧公佈考慮派特別股 息,若下個禮拜四董事會順利通過派息,大股東之一嘅韓國股神就可以即時受惠。
「賣牛」換馬執到
李寧會派幾多息,市場都仲係估 估吓,有證券行計過數,話就算將手頭現金派到盡,最多都只係每股1.57蚊;以韓國股神揸住5240.8萬股計,都係分到8228萬銀。聽落好似唔錯,但 根據港交所(388)資料,韓國股神9月減持蒙牛之後,仲有7086.4萬股喺手,佔4.54%;之後佢有冇再減持就好難講,但就算沽,都係9蚊樓下嘅 事,多極有個譜。呢輪海嘯咁傷,李寧派多多息都補唔番啦。 |