📖 ZKIZ Archives

中電「派錢」 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121211/18096907
上星期五講起與來自矽谷嘅博士T到上海總會吃午飯，佢大概本着矽谷午餐吃三文治或一個蘋果嘅作風，吃咗兩細碗麪及兩隻小籠包就話食夠，其他由左丁山掃晒，食唔完嘅醉乳鴿就打包回家，香港人如果學習呢類美國作風，大概可節省大量廚餘。可幸現已流行「打包」，一群人吃中菜大餐之餘，食唔晒一定打包，問題係邊一位攞呢？主人家要晒就無人有異議，但係若果主人家唔要或者係A A制聚餐，咁就唔知誰人捱義氣嘞，有時我望你，你望我，都幾尷尬。
家裏有廚餘又如何，仲頭痛，啲冷飯菜汁唯有一丟了之。肥仔K話Panasonic在日本有一隻產品，專門處理廚餘，外形似一個特大裝暖水壺，日本人將餸頭飯尾倒落去，可倒足一個星期，廚餘在內受壓液化，變成泥狀，可以recycle做有用廢料。不過香港冇呢類行業呢，故此唔多見呢隻Panasonic產品出售。
上個月碰到Q大姐，約佢去九龍城食晚飯，佢話返到九龍城，等於返屋企，不如就到佢屋企吃住家菜，佢位大廚老公在屋企煮得仲靚，係噃，有大廚老公在家，如無特別應酬，唔返屋企吃晚飯就笨。是晚Q大姐之御用大廚係咁意整三四味出嚟，份量啱啱好，居然三個人食晒，毫無廚餘，大廚真係識計數。Q大姐話佢轉工之後，知道新公司有好多「社區工作」計劃，其中一個係為深水埗區低收入家庭與失業人士提供營養暖餐，叫做有「營」飯堂，佢自己在家都會盡量壓縮廚餘，不要浪費。
當時Q大姐口中之新公司就係中電。中電在上星期四宣佈派錢㖭，公司派錢，香港有無前例，左丁山諗唔起。公司唔係政府，當然唔係人人有份，中電嘅派錢計劃，在2013年推出，受惠人士限於低收入家庭，居住於九龍新界區者，為關愛基金界定之「居住環境惡劣的低收入人士」提供津貼，符合資格嘅家庭將獲三百元津貼，但申領詳情尚待公佈。無論如何，一間大企業能夠主動關顧社區低下基層，總係一件好事，值得稱讚。
PermaLink: https://articles.zkiz.com/?id=41787
Next Page
ZKIZ Archives @ 2019