| ||||||
平 保（2318）今年都算黑仔，呢頭話告人，嗰頭就有人想告佢。首先平保舊年斥巨資入股嘅富通，唔單止業績「滿江紅」，仲累到自己第三季蝕成78億銀（人民 幣．下同）。咁都不特止，據講富通想將銀行同保險業務分家，不過就冇進行股東投票表決，令平保極度不滿，仲話如果喺12月初嘅富通股東會前，仲唔肯畀股東 投票，唔排除會告佢哋。唔知算唔算係五十步笑百步，內地股民「板磚之之王」都話要告人，但對象唔係富通，而係「原告」平保！呢位股民喺122蚊高位買入平 保，點知董事長馬明哲唔聲唔聲，喺冇停牌情況下，突然推1600億融資大計，令平保股價即時插水，連續兩日跌停板，股民損失慘重。 融資1600億唔停牌 「板磚之之王」話蝕咗兩成，點都要董事長馬明哲負責！此帖一出，網民一呼百應，有人仲話「豪」一個月律師費畀佢打官司，亦有唔少人留低電郵，方便一齊諗計仔。 | ||||||