ZKIZ Archives


收市閒情:今年財圈「柒事回顧」

1 : GS(14)@2018-01-08 01:07:26

一年容易又年結,又到「收市閒情」財圈「柒事回顧」。第七位出得嚟行,拎住張夠勁嘅卡片,真係素人變神人!有日你遇見剛轉工嘅陳生,「家陣貴寶號係?」「呢張我卡片……」睇住佢靦腆尷尷尬尬嘅表情,你再望望張卡片,你就明了,「咩話?你間公司叫熊貓綠能(686)?」人起朵你起朵,邊度能呀?睇過?唔少公司都想借改名轉運,咁熊貓綠能前身係咩?就係聯合中伏……第六位中國有樣國術係舉世聞名,嗰樣嘢叫「老翻」!A貨手袋、波鞋、電話……你諗到諗唔到嘅,「沒有假貨的淘寶」都會幫到你。今年4月,香港出現一件神奇事,「喂喂!大陸有份全購絕密通告流出,聯眾(6899)G.O.價4蚊,狗衝無誤。」結果份流出嘅通告,係真係流嘅!原來只要加「機密」兩隻字,唔理來源係咪中國,大家都會以為自己執到寶。第五位一個屎忽鬼,如果識包裝,佢最多俾人話「賤格」;但如果佢屎忽得來唔識包裝,咁就係賤格的白癡。中環摩天輪原瑞士營運商Swiss AEX不獲續約,投資推廣署即時割蓆,將官網摩天輪「成功案例」delete。繼Uber同Gobee.bike後,投資推廣署再一次俾人發現,借外國公司領功,然後過橋抽板,cheap出國際。第四位李澤楷投資嘅網媒Stakk,原本氣勢如虹,仲捧紅咗一班主播。結果係點?係有個「神級」CEO,話班staff「太本土」,一次過發癲式炒晒所有員工。一個人有能力短時間建立一個好好嘅平台,然後又極速將佢化整為零,化為烏有,一舖清袋,真係只有神先做到。至於Stakk以我認知,先變成一個長輩圖page,然後……然後佢封咗唔畀香港人睇了。第三位正所謂阻人發達猶如殺人父母,想當日iPhone X上架,一眾成功F5「F」出部電話嘅炒家,人人諗住即開即食即賺一皮嘢,點知,渣打(2888)信用卡用家,未出機先cut單;去到抽新股,小散戶衝去抽閱文(772),又點知,都係渣打,喺一個講AI嘅年代,抽新股要打電話落飛,仲要冇人聽,就算打得通,sorry,冇孖展!不過你又點估到,doo到盡頭便是賺!批iPhone X炒家,唔單止要多謝渣打幫佢Cut單唔使變蟹,仲賺埋渣打賠嘅Asia Miles!渣打,希望你2018,搞好system。第二位2017最出位新股,一定係健升物流(8457)!正所謂,爆竹一聲除舊歲,新股敲鑼棍都甩!想當日10月18日,健升主席黎健新,於上市儀式以打Golf姿態,三、二、一,大大力一敲,銀牙,支棍飛走了!至於股價,除咗頭幾日喺水面外,至今未上過水面。第一位上年「收市閒情」2016財金風雲人物,第五位燒山/蕭若元,今年成功標尾會,先憑2年前預言,終於燈死樂視;至於Bitcoin死狀更恐怖,本來於20,000美金高位徘徊,點知燒山12月22日唱好Bitcoin,即日Bitcoin就洗倉式暴跌,真係即日!最低更跌穿11,000美元!粗略計算,高位計損失1,500億美元市值!#多謝燒山,令今年「柒事回顧」有個圓滿ending,#燒山好嘢!千頌C
Tag:千頌C,收市閒情,柒事回顧,熊貓綠能,投資推廣署,Stakk,渣打,健升物流,燒山,_mt_投資



來源: https://hk.finance.appledaily.co ... e/20171227/20256139
PermaLink: https://articles.zkiz.com/?id=346448

Next Page

ZKIZ Archives @ 2019