ZKIZ Archives


鼓勵壟斷 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121205/18090337
如有標準工時法例,大企業雖然成本上升,但可以應付,影響不大,但香港有好多中小企,最受衝擊。睇安永會計師事務所為強積金管理局所做嘅研究報告,第25頁講到香港強積金管理成本高,有六個原因,第二個就係:「小規模僱主及自僱人士所佔的比例較高,令交易量增加。」既然香港有咁多小規模僱主,有硬性標準工時及男性產假嘅話,調動人手當然困難得多,唔駛講得咁複雜,就如港交所要延長交易,削減午飯時間,現在有一個鐘,將來零個鐘,此議受工聯會屬下證券業工會激烈反對,但A組經紀(外國經紀大行佔多數)則無異議。無他者,大行有不少人可以輪班當更,交替出外吃午飯,中小本地經紀行嘅員工可能一眼望晒,經理係佢,交易員係佢,聽人客電話係佢,出外聽基金講座、上市公司IR(投資者關係)演述嘅又係佢,唔俾時間出外吃午飯喎,點做生意呀?假如將來有兩個男職員、女職員同時放埋產假,公司幾乎可能暫停營業㖭。
施永青憑本身經營經驗,就講述政府愈多監管條例,愈多工作法規要企業遵從嘅話,中原地產代理就愈壯大。小經紀代理公司難以生存,不如摺埋,老闆走去中原/美聯打工!所以施永青估計,有咗男士產假之後,更不利中小企,更有利於企業集中(講唔好聽就係大吃細),政府與工會及一啲壓力團體不明此理,得把口去反壟斷,保護工人,但佢地叫擁護嘅政策,無一不鼓勵壟斷,摧毀個體企業。
西班牙、意大利等國家有好嚴密嘅保障工人權益法例,結果就係大量年青人失業(希臘與西班牙嘅年青人失業率超過50%,歐盟整體失業率逾11%),冇法子搵到工作,要政府救濟,加重政府財政負擔。香港工會及立法會內之泛工黨正邁向意大利西班牙方向前進,香港市民不可不警惕。最低工資,無資產審查長者生活津貼,標準工時,一步一步進逼,最後就係搞全民退休保障;港大王于漸教授大聲疾呼,全民保障是錯的,唔知特區政府領導人聽唔聽得到,希望佢地除咗應付僭建之外,搵啲時間諗清楚:習近平話道路決定命運呀!
PermaLink: https://articles.zkiz.com/?id=40759

Next Page

ZKIZ Archives @ 2019