📖 ZKIZ Archives

排隊生意 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121121/18073738
十一月十四日中午，左丁山行經中環H&M門外，發覺已有十幾人在皇后大道中鋪報紙，坐地下，內有南亞裔、菲律賓裔，男女都有。睇情形，一定係排隊入店內購物，於是在大門望一望，嘩，一個甚麼牌子三個Ｍ嘅時裝在H&M出售，日期係十一月十五日早上八時開始，乜二十小時前已有人排隊，唔通佢地告咗假好得閒，抑或全部係無業人士，還是家庭主婦、主夫？
次日記者小Ｇ在中午時份經過H&M，發覺排隊已排至租卑利街，真係幾誇張，係咪香港人咁鍾意呢隻牌子嘅呢？問吓秘書Ｖ，佢話：「三個Ｍ係名牌子嚟㗎，與H&M搞cross-over，一條褲賣890，比平時少咗一個零噃，我都想去買，不過唔想排隊啫。」唔，既有此心態，經濟學理論話俾我地聽，一定有排隊黨出現，排隊人士之中，必然有一啲職業排隊工人，佢地行到門口之際，真正掃貨人就會收到通知，及時閃出嚟，代替排隊人入內掃貨。小Ｇ對左丁山講：「呢樣係公開秘密啦，已知幾位明星好輕鬆咁行入去，佢地梗係有人代為排隊啦。」
凡有排隊出現，一定係供不應求嘅現象，三個Ｍ牌子衣褲在H&M出售，價錢比平時低幾倍嘅話，而又限量銷售，結果當然係會出現排隊及炒賣，就似促銷新樓盤手法一樣，以低於市價在首天發售十個八個單位，引來大量人士排隊，在此情況下，排隊好合乎經濟理論嘅預測。但又有人話「排隊黨」不公義，變成出高價者（如明星）享受服務，窮人就被排擠（例如免費交響樂表演，清明上河圖電子版展覽）。如何解決「供不應求」或「低於市價」製造大量需求嘅問題？經濟學家會贊成用價格解決，咁就會俾一啲文化社會學家罵得要死；那麼用網上抽籤，攞籌抽籤，讓十萬八萬人一齊抽籤，抽出一萬幾千張送俾幸運兒啦！但抽到嘅幸運兒拿出入場券在網上拍賣又如何？做黃牛黨又如何？拉晒佢地呀？哈佛大教授Michael Sandel不知計將安出？若不用價高者得、市場調節方法解決供不應求嘅問題，而用大量行政手段，結果其實未必一定合乎某些人心目中之公義標準，但交易費用（納稅人負擔）必然大增。
PermaLink: https://articles.zkiz.com/?id=40078
Next Page
ZKIZ Archives @ 2019