📖 ZKIZ Archives

從政講現實 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121031/18052877
商務印書館有成立115年雅聚，左丁山忝陪末席，世貿會所內真係「群賢畢至」，但非「少長咸集」，因為賓客之中，大教授最多，做得大教授，當非青少年。左丁山遊目四顧，座上有資格攞生果金者，似佔半數以上，不過立法會已中止討論特惠生果金，額外2200元暫時冇得攞住，梁特首想話以此為實踐競選政綱第一炮，點知受制於民建聯與工聯會，佢心目中嘅德政變成濕水炮仗，燒唔著，是為不吉之兆。傳統左派似乎唔怕新左派特首，亦未必樣樣政策都支持，特惠生果金是其一，反對撤回啟德體育城是其二，工聯會議員反對陸恭蕙副局長所講──擴大將軍澳堆填區是其三，泛民議員加上民建聯、工聯會，成為「泛工環保黨」，梁特首以後幾年有排頭痛，想唔去西環求援嚟鎮壓民建聯、工聯會都唔得。
宴會上有咁多博士學者，自不然要請教嚇學者論政，學而優則仕嘅問題，學者做政府公共政策智囊，可否幫助政府？博士L私人識得基辛格博士，佢話所有有志於從政嘅學者，都要讀基辛格回憶錄，勿忘基辛格之言。在政府公共行政過程中，要注意嘅不是學院派在大學講書What is desirable?而係要講在議會政治框架下，What is possible?研究就講「最佳、最理想」啫，走出象牙塔，去到深水埗、中環視察完，就要度出甚麼是「最可能做得到」，即係甚麼政策最可能得到過半數議員支持，可以通過嘅務實政策。呢類政策通常是second best（次佳），甚至係third best，令純學院派感到不滿，不明白此道理者，學者入政府就會碰到一鼻子灰。
以此觀之，特區政府之「特惠生果金」附帶資產申報政策，從政府理財角度睇，係desirable；但政治上，因有泛工黨之存在，特惠生果金附資產申報，就係政治上not possible，除非政府大幅度提高資產上限令資產申報形同虛設！聽完博士的教導，茅塞頓開，博士L又話：「劉兆佳教授做完十年中央政策組阿頭，回覆平民身份，寫咗一本新書《回歸十五年以來香港特區管治及新政權建設》，啱啱由商務出版，你快啲讀一讀，學嚇嘢！」
PermaLink: https://articles.zkiz.com/?id=39482
Next Page
ZKIZ Archives @ 2019