拆停車場起公屋 左丁山
http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120922/18021746陶冬博士慨嘆香港舖租狂升，不可持續，遲早爆破，現在可能係賣樓時機。佢一人唱淡，多人唱好，原因只有一個，就係美國聯儲局推出第三輪量化寬鬆
（QE3），全世界投資、投機人士瘋狂。本來印銀紙咁多，通脹必定隨之而來，何況今年美國農業州份有大旱災，玉米、黃豆失收，明年必然帶來食物通脹，而過
去兩次QE證明，幾個月後，油價隨時會爆升，但點解伯南克唔驚呢？聯儲局只關心核心通脹，即通脹要扣除油價與食物價，扣除之後，美國通脹率非常平穩，停留
在2%或以下，故此伯南克不用理會通脹，至於一般平民百姓飽受汽油漲價，麪包漲價之苦，伯南克不當一回事嘅。
有QE，推高資產價格，富人賺取嘅非
工資收入，不斷增加，必然推高堅尼係數，貧富懸殊加劇，富者愈富，強國富人尤其得益，仲唔嚟香港為名牌血拼？陶冬話未必如此，因香港租金太貴，奢侈品價錢
比歐洲還要高，佢啲「真正高端朋友」已紛紛去歐洲旅遊兼掃貨，唔吼香港咯。話雖如此，市區繁盛地區租金狂升，令一啲本地牌子頂唔順，退而思其次，只得搬入
一啲比較似樣嘅翻新領匯商場，於是領匯因此俾啲社運派大駡逼走小商戶。其實領匯不斷表示，在領匯商場內，舖頭面積（實用）細過一千呎嘅商戶比例，自領匯上
市後，其實佔租約六成，組合mix自然有改變啦。
經濟學教授C好識慳錢，經常揸車泊在南昌站隔籬嘅富昌邨停車場，每小時收費八元，然後坐地鐵到港
島開會，便宜兼快捷妥當喎。原來佢識得好多屋邨停車場，皆與領匯有關，一啲生意旺盛，一啲門堪羅雀，搵多架車睇嚇都冇。東涌有一個領匯停車場（逸東邨）更
加封咗唔開㖭，為何不申請改為其他用途？教授C有此一問，左丁山於是搵一位知情人士答。佢話：「政府物業就做乜都得，私人公司（領匯）物業如要改變用途，
手續程序非常繁複，即使停車場汽車泊位過剩，電單車位不足，亦不能將汽車位改為電單車位，除非修改地契！」唔，咁就除非有凌駕性需要，否則一動不如一靜
咯。一位朋友慨嘆，政府常話冇地，不如就向領匯買番類似東涌嘅冇用停車場，拆咗嚟起公屋啦！