|
||||||
响台灣有「綜藝天王」之稱嘅吳宗憲，剩係做主持，年度收入就有過億台幣，其實買吓磚頭投資股票保值，下半世根本唔使憂，偏偏吳宗憲鍾意做生意做老闆，過往開過糖水鋪火鍋店健生中心等等等等，通通執笠，估計前前後後冇咗4億台幣身家。 唔服輸，吳宗憲生意愈搞愈大，四年前投資3億台幣搞LED燈生意，學人做科技大老闆，點知衰多兩錢重，之後俾人踢爆拖欠員工薪金。 冇生意，冇糧出，大不了關門大吉，但吳宗憲由舊年開始不斷官非纏身，除咗牽涉內幕交易及虧空公款，更被追債2,000萬台幣，因為冇錢還被債主告上法庭，吳宗憲名下三個物業被法庭查封，最慘係因為呢單案，吳宗憲俾人發現銀行得番150萬台幣存款。 窮到你唔信，有傳以前受過吳宗憲恩惠嘅巫啟賢，即刻借出400萬俾恩公解燃眉之急，不過吳宗憲通通否認，仲鬧記者：「關你什麼事？」聽講佢之前已經賣樓賣車套現4億，但問題係傳佢欠債8億，呢條天文數，搵安信兄弟出馬都好難幫到手。 巫啟賢承認有借錢俾吳宗憲：「以前我窮困潦倒時，憲哥幫過我，現在是以兄弟之情來報恩。」至於金額係咪外傳400萬，巫啟賢則拒絕透露。 | ||||||