ZKIZ Archives


冰說聰明:中小股炒兩個概念

1 : GS(14)@2018-02-04 23:50:48

近期青冰講得最多嘅兩個概念,係大灣區及港股通新標的,因為這兩個概念,絕對有機會令中小型股份升呢,如果有一隻股食兩家茶禮,就真係不得了,時代地產(1233)可能就是唯一的雙概念股。大灣區規劃應該快將出台,港珠澳大橋亦將於年內通車,但對於大灣區,雖然吹到話會搞醫療及教育等等,不過市場暫時都只係會想到內房,樓價看漲,對於有六成土儲在大灣區的時代地產來說,受惠是必然的事。按半年業績披露,佢哋在大灣區的銷售額,佔收入的87%,區內樓價趨升,有助毛利率再上。相對於同區的同業如龍光(3380)及奧園(3883),時代地產今年只升26%,相當落後。證監會在2015年指時代地產股權高度集中,所以MSCI在2016年初剔除佢出成份股,由於恒指服務公司都有相同規則,即使佢的市值及流通量成交超晒標,都入唔到小型股指數,換言之做唔到深港通標的。有見及此,時代地產去年6月出咗個11頁的通告,指股權集中的問題已解決,目標直指8月的MSCI及深港通重檢,可惜兩間指數公司都唔領情,冇將佢納入。又或者咁講,當日指數重檢的截數日係6月底,你6月初先出通告,未必有足夠時間及說服力。好喇,半年過去了,2017年的月均市值已升到109億,相信今次入選機會頗高。內房普遍債高,時代地產亦不例外,但佢哋自2014年上市至今,從未批股,相信只要有深港通作催化劑,估值追貼番同業,屆時開動抽水機,都係理所當然,所以現價值博率高又安全,坐定定等下星期二出結果吧。青冰
http://fb.com/chingbing888本欄逢周四刊出



來源: https://hk.finance.appledaily.co ... e/20180201/20292142
PermaLink: https://articles.zkiz.com/?id=347888

Next Page

ZKIZ Archives @ 2019