📖 ZKIZ Archives

業績簡評 - 大快活集團 (0052.HK) PARTIPRAL 派得好

http://partipral-hk.blogspot.hk/2012/06/0052hk.html

























大快活今午公佈成立四十週年全年業績, 上下半年營業額相若, 全年計則微增近一成, 繼續創歷史新高. 毛利率連續三個半年下跌, 而且今期跌得算急勁, 主因乃員工開支急升6千多萬. 換個角度計, 其實其他經營開支壓力反而不算太大.由於員工人數無增加, 今期僱員支出飆升完全來自最低工資影響. 員工成本眨時間抽高14%, 但由於餐牌不能同步大幅加價, 結果短期毛利受壓. 

純利1.3億, 但當中有千3萬屬一次性收益, 調整後核心盈利約為1.17億, 同比微升8%左右. 大快活財政上無壓力, 借慶祝四十歲生日而大派特別股息以回饋股東並無不妥; 加上期內不斷作出回購, 對股東亦有利. 不過此舉亦有多少暗示公司擴展步伐不會太快, 估計緩步推進仍然係大快活將來發展方向. 

個人最關心既係大陸分部表現, 營業額環比下跌7%, 乃近4個半年業績首見. 溢利更加跌到不似人形, 分店一次性支出會係拖低盈利其中一個原因, 又或者係入賬時間問題, 導致大陸今年上下半年盈利反差咁大. 由於管理層於業績報告內無作出交代, 外人較難估計實際問題出響邊度. 其實相若情況09年都曾經出現過, 所以都無需過份擔心, 可以睇多期業績先再下定論.

不過分店只多開2間, 如果拎番中期業績報告既22間分店目標黎對答案, 今次明顯係唔合格. 而今期業績報告之中亦無再提及早前已訂下之2014年前開夠40間既目標, 估計最終不了了知機會好大. 何解只係半年時間, 管理層對發展內地市場既取態竟然出現如斯大之轉變? 大快活估值上所謂既內需溢價, 因為今期業績, 可能要打上好大好大折扣. 

大快活股價今日午市借派特別股息消息而急漲, 但今期業績最值得擔心既地方係曾經有一段時間做得唔錯既內地分部, 發展上可能已經漸見阻力. 現價$14, 以核心每股盈利$0.925及基本派息$0.6計算, P/E 15倍, 息率4.3%, 計及未來發展空間, 目前估值上可以再上調既空間應該不多. 整體而言大快活今期業績係令我有多少失望, 既然市場對突派高息趨之若鶩, 避免持倉過重, 我亦唔介意聽日開市趁機減持.
PermaLink: https://articles.zkiz.com/?id=34634
Next Page
ZKIZ Archives @ 2019