81歲化妝大師陳文輝病逝
1 :
GS(14)@2017-10-09 00:03:51陳文輝
【本報訊】有「TVB化妝大師」之稱的陳文輝今年7月病重入院，據悉吸煙多年的他今年6月發現患上肺癌，於港島區一間療養院接受治療，昨晚8時15分因病辭世，享年81歲。其子陳志達向親友發短訊，他接受本報電話訪問時，語調平靜地表示：「因為個病都定咗係末期，我哋都係想令佢冇咁多痛苦，同埋之前都講咗唔好同佢做化療，同埋同醫生話唔需要同佢搶救，佢好安詳，毫無痛苦之下離開世界。」陳志達透露父親彌留期間，家人均在身邊：「由噚晚開始屋企人已經守候喺佢身邊，送佢最後一程。」問到輝哥有否心事未了，陳志達表示：「冇乜心願，都係關心屋企人，佢有孫有塞，佢有個大孫都係做呢行今日啱啱見完佢。」輝哥兒子表示未諗到身後事的安排。
■陳文輝於2004年退休，不少藝人出席其榮休宴會。
薛家燕難忘托下巴化妝
輝哥第二任太太Deborah昨接受電話訪問時表示：「之前佢喺QE，醫生話冇醫療可以畀到佢時，佢都好down，我哋即刻同佢轉咗嚟療養院呢度，畀佢食中藥，我覺得有幫助，因為佢唔辛苦，走嘅時候同瞓覺冇分別，佢食嘅止痛藥份量都係我哋平常食嘅必理痛份量重少少啫，最安慰都係佢唔痛。」她表示輝哥多親友愛錫：「佢又有孫又有塞，佢走嘅時候已經賺咗，覺得無憾。」提到輝哥在中秋夜的8時15分離世，她表示：「今日啲孫同仔同新抱都有嚟晒醫院探佢，已經團咗圓，雖然喺呢個日子走幾特別、對我嚟講好深刻，但佢走得一啲都唔辛苦，呢個係我最感到欣慰。」輝哥離世，由童星年代已與他合作的薛家燕表示難過，提到二人難忘事，她表示：「細個我化妝成日瞌眼瞓，佢話要托住我下巴同我化妝，因為我『舂吓舂吓』，放咗學就去拍戲。」她大讚輝哥在電影電視化妝上貢獻大：「好多特別妝係佢化出嚟。佢化個底特別靚，特別滑，冇辦法，年紀大，天下無不散之筵席，好懷念佢，希望佢家人節哀順變。」汪明荃在電話表示一個月前探過輝哥，對方好高興，二人緬懷往事：「知道佢走咗，當然非常難過！大家喺TVB，我好多靚造型，都係佢幫我化，佢好緊張藝員出鏡，尤其面部同頸部係咪一樣色，佢話頸部都要搽粉。最深刻印象係佢幫我化大戲妝，當時做《歡樂滿東華》，一般大戲妝係好紅，但佢話電視唔可以紅，大家一齊研究點化。」■記者戴彩煥、余燕儀
來源:
http://hk.apple.nextmedia.com/news/art/20171005/20173246