📖 ZKIZ Archives

2800萬贖金風暴拍《天若有情4》王宗堯做新華Dee綁架陳妍希

1 : GS(14)@2015-05-05 22:54:53

■預定10月開拍的《天若有情4》屬意王宗堯和陳妍希做男女角，大賊則有邵仲衡和黃光亮扮演。設計圖片及對白



杜琪峯監製、陳木勝執導的90年電影《天若有情》因為成為經典浪漫愛情片，捧紅了兩位主角劉德華和吳倩蓮，該片後來一連拍攝了三集。如今蕭定一計劃購下版權開拍第四部曲，這次故事還會加上西貢2,800萬元綁架案部份情節，男主角華Dee會起用旗下藝員王宗堯飾演，女主角富家女屬意陳妍希演出，其父親由鄭少秋擔演，影片預計10月在飛鵝山開拍。


已故針織大王羅定邦孫女羅君兒綁架案哄動全城，綁匪迄今未全部落網，蕭定一已看準綁架案部份過程，作為《天若有情4》的故事藍本，由今年初他已經有構思買下版權開拍《天4》，當時已經想寫城中知名富豪女兒被綁要求巨額贖款，但想不到其中一名綁匪竟然愛上了富家女，瞞着其他同謀放走富家女，之後兩人譜上愛情戀曲。



■華仔與吳倩蓮當年主演的《天若有情》成為經典，迷倒千萬粉絲。劇照

■《天若有情4》女主角屬意陳妍希飾演，網友肯定又有一番爭論。台灣《蘋果日報》



搵秋官做富商

蕭定一昨日證實已在籌備這部片，他在電話中說：「其實我一早諗咗開拍《天若有情4》，當初劇情係有綁架富家女，然後綁匪之一嘅華Dee憐香惜玉，不自覺愛上富家女。呢個係之前已度好嘅劇情，點知最近出咗羅君兒綁架案，如果將部份情節放入部戲應該會更豐富，可以增加商業元素。男主角華Dee我想畀王宗堯演、富家女就陳妍希做，爸爸角色最好係鄭少秋，邵仲衡同黃光亮做賊匪，廖啟智就演警察指揮官，導演人選有幾個揀緊，心目中就想搵邱禮濤，覺得佢拍呢類型片幾適合。」由於這宗綁架案警方還在調查中，問蕭定一會否擔心受害人和其家人不高興？他解釋：「其實我部戲主要係拍愛情故事，而且係打正招牌拍《天若有情4》，並唔係主力拍富家女被綁票，純粹攞部份被綁過程做藍本，所以應該唔會觸動到受害人嘅神經，部戲10月就會喺香港開鏡，等劇本修改好，就會陸續傾演員啲期啦！」



■因《大時代》重播，秋官（左）和邵仲衡人氣又高漲，連蕭定一都想找他們拍戲。電視圖片

■廖啟智在《天若有情4》演警察，負責追查富家女被綁架案件。資料圖片



同妍希要磨合

蕭定一公司要力捧王宗堯成為新一代偶像，大膽起用他演華仔曾演過的華Dee角色，昨日他接受電話訪問說：「我有留意嗰單綁架案，我最初睇係以為走犯，後來揭發咗受害人身份，我係識羅氏後人，當年我去英國讀書，我同佢哋後人係同學。」蕭定一有意開拍《天若有情》新版，並滲入綁架元素？王宗堯說：「我聽老闆（蕭定一）講過，知道題材有綁架線，但我好怕好似當年經典戲，怕比較，我一直覺得劉德華同吳倩蓮嘅《天若有情》係神級，無敵神戲，佢哋騎電單車一幕好深刻，無法超越。」對於新片女主角意屬女神陳妍希，王宗堯反問：「真係？」正好是香港男神配台灣女神，王宗堯卻說：「公司搵邊個演，我哋雖然冇權過問同畀意見，但我好希望對手係香港女演員，我同陳妍希唔熟，夾過先知夾唔夾。」採訪：鍾國仁





來源: http://hk.apple.nextmedia.com/entertainment/art/20150505/19135650

---

摸魚手札：彤叔為首的大DEE會何去何從？

1 : GS(14)@2016-10-02 12:13:59

彤叔逝世，同系的股票集團不會產生管理問題，因為彤叔在病榻多年，一早能安排的資產都已預備。報道也講過，隔代的承繼人也安排好了，現在第二代和第三代兩條戰線並行兼互補。也許是命運安排，彤叔最後無緣見到仇家Donald Trump登上總統權力寶座。人所共知，Donald Trump在1994年走投無路，找了香港富豪彤叔一伙、羅康瑞、邱達昌注資發展紐約一帶的River South地產項目，其後，因為分錢問題，Donald Trump以賤賣資產為由一起對簿公堂，兩派人從此結怨。至於那個傳說中多年在股壇呼風喚雨，以彤叔為首的富豪鋤DEE會早幾年也日趨低調，名存實亡。隨着彤叔逝世，只怕人走茶涼，有個好理由解散。大DEE會成為了《竊聽風雲2》「地主會」的原型，名字都係賭錢的玩意兒，實際是一支友好的商人黨。當然電影這回事，是加鹽加醋，如有雷同，實屬巧合。



這些商人黨一起投資股票，一起合作搵錢，原理都係玩群星拱照，出錢出力出名氣，一方有難，八方支援。例如恒大地產、佳兆業上市，成班富豪做基礎投資者，一起出席上市活動做公關支持。這一個商人黨，也帶起了許家印和「重慶李嘉誠」張松橋，將他們推上更高一層樓。不過，這一兩年大DEE會都冇乜驚世大刁，近期比較密是大劉跟許家印的地產買賣刁，涉及金額雖然夠大，但不能跟之前那些規模相比。大概彤叔身體轉差，群龍無首，所以各人自成一派做自己生意，在資本市場的合作往來也不及以前密了。這些富豪埋堆會在股壇的影響力也像香港普遍的政經形勢，慢慢褪色染成紅。這一個鋤大DEE會的business model也被喜歡山寨的內地商人抄了過來，現在最當紅的炒股商人黨是馬雲為首的雲峰基金一路人馬，成為香港股市最強的一支人馬。有時我也覺得奇怪，鬥地主是3人玩意，大DEE都是4人玩的，如果這一個商人黨聯盟要做大，達到多人參與，起碼都打taxas holdem嘛，因為最多可以10個人玩。聞說雲峰基金一班人是打德州撲克的，這不足為奇，因為雲峰基金的香港代表蔡朝暉除了精通香港資本市場，也是有世界排名的一流德州撲克高手。這些友好商人黨，不論政經影響力，連賭的玩意，也是與日俱進呢，也難怪在泛中國地區越搞越大了。渾水




來源: http://hk.apple.nextmedia.com/financeestate/art/20161002/19788062

---

鋤Dee會一晚千萬上落鄭裕彤孖富豪由晚玩到朝

1 : GS(14)@2016-10-13 08:09:35

鄭裕彤(彤叔)在香港超級富豪中輩份雖高，但他卻喜歡與後輩的中港富豪一齊「鋤Dee」飯局，他曾在訪問中提及鋤Dee有助腦部記憶及廣交朋友，他在自傳亦提過愛牌局，但不會瘋狂賭博：「如果你賭得比我精，我唯有迴避一下，甘拜下風。儘管我有機會贏，但我深明運氣不會永遠有，我雖然是澳門娛樂公司主席，但入賭場我也不賭，我知道永遠都是莊家贏的。」彤叔是鋤Dee會的首領人物，其他鐵腳有「大劉」劉鑾雄、楊受成、恒大地產主席許家印，以及有「重慶李嘉誠」之稱、中渝置地主席張松橋等。據可靠人士報料，鋤Dee飯局多在灣仔皇朝會、遊艇上、大劉或彤叔家中舉行，一個星期聚頭兩次。由於彤叔愛鋤Dee，高峰期試過一星期開足4、5次啤局，眾富豪的「Dee腳」由下午3時開局，玩到翌日早上6點才散。早期他們愛玩鋤大Dee，每輸一隻注碼大概為一萬元，曾試過一晚有一千萬上落，要開支票結算。直至近10年，鋤Dee會轉玩「鬥地主」，曾與彤叔交過手的富豪透露：「彤叔記牌好叻，鋤Dee記得晒仲有咩牌未出，就算玩鬥地主，佢記唔晒啲牌，自己冇『鬼』喺手，都炸咗先，好博，真係佢『沙膽彤』本色。」萬一遇上運氣不佳，彤叔都不會發脾氣，但就會要求換一副新牌。另外，玩具大王蔡志明與彤叔相識逾20載，不時定期飯局聯誼，蔡志明接受《蘋果》電話訪問時透露彤叔是他很敬重的長輩，不時獲彤叔邀請開局：「不過我唔想贏朋友錢，我去睇多，唔會落場。佢哋成班一個禮拜會有一、兩次鋤Dee局。」提到鋤Dee注碼，蔡志明笑言不方便透露：「佢哋睇心情，有時大啲、有時細啲，銀碼我見過一晚有300、400萬上落，佢哋贏咗、輸咗都唔會特登要開支票，會記低個數。佢哋個個都係富豪，都唔係話鬥嬴錢，大家都咁多錢，都係鬥下牙擦。」蔡志明從彤叔鋤Dee情況中，看到對方「牌品好人品自然好」，他說：「佢鋤Dee除咗運氣好，又識數牌，亦都好叻心理戰。佢喺賭枱同平時一樣，都係好好人，絕對唔會火爆，我就冇見過佢發脾氣，佢輸咗被人炒最多唔出聲，隔一陣又會講番笑，有時大家有少少拗撬，佢會做和事老；有朋友需要錢銀周轉，佢都會幫，當然用嚟賭錢佢就唔幫啦。」眾「Dee友」聚首一堂，除了聯誼，更會爭取機會向彤叔請教如何做生意：「我哋成班有時問下彤叔生意有咩大計，佢會幫我哋分析，有佢叫大家『去馬』，個心會定好多，佢亦都會叫我哋一齊去投資，例如上市抽新股投資。」




來源: http://hk.apple.nextmedia.com/entertainment/art/20161013/19799077

---