📖 ZKIZ Archives

如有提及請勿介意 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120524/16362893

此日晨早接到某君來電，詐晒型，請左丁山以後唔好提佢，左丁山話：「喂，冇寫你個名喎，又冇爆你任何私人機密、公司機密，講吓過癮事情啫！」某君云：「總 之你個欄太多人睇，我嘅身份俾幾位行家猜中，打電話嚟取笑，請你高抬貴手。」
唉，都唔記得幾時提過佢乜事咯，算了吧，因佢之事，想起幾年前見到財 經 M，當時佢仲係做緊高官，未辭職，佢對左丁山講：「每朝吃早餐睇你個欄，我視為猜謎遊戲，睇你所寫嘅賓架 A，賓架 D，賓架 W係唔係我識得個幾位賓架，有時一猜就中，幾好玩！」財經 M以此為樂，相信不少其他老友亦然，其中又有一啲唔想俾人寫，要刻意保持低調嘅朋友，以後要留意多啲，謹此向各位老友致意，如在本欄提過你地而又俾你地老 細、同事、朋友猜中，令你們產生若干尷尬嘅，左丁山在此道歉，鎖你鎖你！
此日賓架 W與地產 M約吃午飯，因大家事忙，夾日子難搞，三方秘書一個月前夾咗好耐先至搵到呢日中午，想唔到賓架 C亦大駕光臨，平時好難搵到賓架 C嘅噃？
賓 架 W話：「今朝早上在馬會水池游水，碰到賓架 C，佢話相請不如偶遇，今日中午冇約，不如一齊吃午飯，我話如果你唔介意，參加埋我地三位飯局囉，佢一口應承咗！」如此更好，否則再約齊地產 M、賓架 C呢啲大忙人，可能又要等多一個月。咁嘅偶然聚會，想不到擦出火花，竟然為某些事情做腦震盪談出一個可能可行方案，大家滿意而去，四個臭皮匠，幾乎等於一 個諸葛亮。
事後與賓架 W行路返灣仔，原來佢地俾業主加租35%，業主係老友都冇情講，因為市場趨勢無人可以阻擋，唔怪得大人物馮國經對香港電台自由風講，今天影響香港競爭力之 最大因素就係商廈與零售店舖嘅租金！租金豈止嚇怕部份外資，亦產生一連串嘅「擠出效果」（ crowding out effect），即大名牌/珠寶鐘錶店擠出本地名牌，本地名牌退守二線街道，擠出本地名氣商戶（如飯店、麵包店，雲吞麵店索性賣舖停業），一波復一波，將 本地連鎖店掃入領匯翻新商場，跟住擠出若干守舊經營嘅商店。不少人乘機罵領匯之時，忘記了罵政府，點解規劃土地時，完全忽略商場店舖之新供應量？土地供應 短缺，乃商業租金大升之最基本原因！


PermaLink: https://articles.zkiz.com/?id=33818
Next Page
ZKIZ Archives @ 2019