各界2047年預言
1 :
GS(14)@2017-07-01 10:46:30柯小姐（大學生）
「（30年後香港）應該會好亂，好多大陸人……都擔心（全街講普通話），其實?家成條街嘅人都係講緊普通話，呢個現象已經越嚟越普遍……如果你話講普通話都仲可以，但變成簡體字就冇道理囉，因為用開繁體字就應該堅持用返，唔應該話要遷就佢哋。」
雷先生（學生）
「其實都係變咗做中國嘅啫，一國一制囉，2047年後唔會有真普選，六四集會都可能被禁止，?家中共不斷染紅香港，令到香港好多人權、自由都冇，呢個情況由回歸開始已經有。即使喺極權下傳媒都有生存空間，《蘋果》消唔消失就睇營銷手段同報道手法。」
李小姐（私人助理）
「30年後樓價繼續升，相信好多香港人都死晒啦喎，同埋應該移民咗去第二度地方，冇可能咁樣升㗎喎，但係始終中國政府做咗好多嘢令香港中國化，相信喺呢個情況下樓價飆升係好正常，到時亦有好多人生存唔到囉。」
梁先生（工程業）
「你睇得出不斷有講普通話或內地精英落嚟香港，就算2047嘅時候都係呢班人護住香港、統治香港，獨立嗰啲都唔會發生……最怕內地精英到時控制香港所有中產階級，呢個先最重要，到時香港咪變咗中國一個城市，呢個係必然㗎囉。」
黃小姐（社工）
「對2047年有真普選冇太大希望，因見到林鄭上場後，可能好快23條立法，可能我哋行出嚟之後會受到打壓，覺得香港越嚟越大陸化，所以唔敢講2047會發生乜事，我覺得所謂嘅普選係有嘅，但所謂一人一票就係中共內定兩個，唔係香港人想要嘅真普選。」
羅先生（廣告業）
「2047年？唔好話30年啦，3年都唔敢講，唔夠膽想像，到時23條應該立咗法，係睇形式上有冇少少轉彎（空間），我諗言論自由嘅範圍會縮細好多，同大陸?家嘅城市冇分別……以後睇新聞都係睇網上㗎啦，唔會有一份印刷嘅喺街度賣。」
戴耀廷（港大法律系副教授）
「啲人諗2047年，其實係假設中共仲喺度，我覺得呢個係好大嘅問號。如果中共以?家嘅形式繼續管治落去，未來十幾年中國已經要面對好大變化。不如諗咗點樣面對中國好大嘅轉變先啦。所以我唔覺得我哋需要諗到2047，呢個問題問得太早。」
陳健民（中大社會學系副教授）
「呢件事在乎中國。中國嚟緊十年八年都面對幾大轉變，就係習近平用?家嘅方法反腐成唔成功，之後會點？係走向更專政抑或自由化？我諗呢幾年要睇咗中國變成點，睇吓佢對香港會點。如果按?家呢種政策落去，唔使到2047年，香港都一國一制。」
田北俊（自由黨榮譽主席）
「我覺得到2047，可能香港人唔咁緊張一國兩制，因可能中國十大城市已同香港生活水準冇分別……佢哋好過我哋嘅話仲有乜好驚？當經濟發展得好，資訊一定流通，市民一定唔做順民，唔做順民唔一定反政府，你有腦會諗，發表意見，已代表自由、民主。」
梁國雄（立法會議員）
「如果你話2047香港可能變做一國一制，咁共產黨就冇需要2047前行一國兩制，就算佢講係一國兩制，其實都係一國一制。如果我哋?家維持唔到（一國兩制），話要確保2047維持到係嘥時間。若港獨、自決只限於你係咪信守97年嗰個制度，係冇意思。」
謝偉俊（立法會議員）
「再過多30年，香港唔會再搵得番以前嗰種地位。如果想香港繼續做國際城市，中英水平、禮儀、文化好好，呢個唔會再發生，因香港唔再係殖民地，將會係一個華人味道重嘅地方，價值觀唔會好似97前咁，好多嘢都已唔同咗，香港係變緊做一個內地省市。」
李卓人（工黨副主席）
「中國若繼續專制獨裁，就要睇香港仲有冇利用價值，如果有，北京可能仲想香港不變，但都無癮啦，我哋係想向前、命運自主。我某程度係樂觀，因香港有個公民社會、自主意識強，中共唔係咁易食咗我哋，但我哋守得住香港，係咪攞到民主？我唔敢樂觀。」
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/news/art/20170701/20075150