仔女快樂≠媽咪快樂肥媽：創傷係永遠㗎！
1 :
GS(14)@2017-06-25 10:11:19又到人哋家事（但又關大家事）嘅時間…之前講過曾經受過家暴嘅肥媽Maria Cordero同林雅詩，上《關你家事》做嘉賓，講到家暴經歷，林雅詩話個仔原來暗地裏好驚爸爸（林雅詩前夫），一講呢啲，佢又眼濕濕，節目中嘅專家提醒林雅詩，如果想再發展一段新關係時，可能會驚咗，個人變得敏感，就喺呢個時候，林雅詩就搭嘴話會有陰影，啲眼淚就嚟料，佢哽咽話：「好多嘢會有陰影，會好驚囉！接觸人呀，或者再有個新嘅感情，會好驚囉！」肥媽就話：「你都儍嘅，驚咩啫？衰過佢好難搵，好過佢嘅周街都係。」去到咁，林雅詩破涕為笑。然後，終於到咗到萬眾期待嘅喊位，事緣個案主角Wilson話希望已離異嘅父母可以喺番埋一齊，一家四口齊齊整整咁，但係估都唔估到有「大眾阿媽」形象嘅肥媽，唔同意呢個講法……肥媽話：「希望所有嘅子女，因你哋嘅寄望呢，係一家人齊齊整整就好快樂，你記得，個快樂係你嘅，我唔介意我啲仔女同邊個結婚，因為我想佢快樂，相對嘅做仔女一樣，我唔介意我媽媽有冇丈夫，或者會唔會嫁過第二個，或者爸爸會唔會娶過第二個，因為最緊要佢幸福。」「因為你哋咁多人，除咗我同佢（林雅詩）都冇人有資格講，就係……當你被一個人（肥媽停頓咗3秒，深呼吸）打嘅時候，嗰種創傷……嗰種身體……唔係你講兩句可以抹咗（眼淚來襲！）。尤其是自己啲仔女被人打，係幫唔到嗰種創傷，唔係你哋講佢已經改咗喇，你o依家做咩呀？改功課呀？佢做完作業之後、改完功課，得喇畀佢pass咩？唔係呀，嗰種創傷係永遠㗎！」最後，肥媽再話：「最緊要你睇到我快樂，我同佢一樣，當我哋離開嗰陣時，嗰種快樂呢真係好似飛天咁，真係好似可以飛嘅咁，嗰種嘢係你冇辦法明白嘅。」肥媽覺得，一家人齊齊整整唔使住埋一齊，係追求quality time唔係quantity time（即重質不重量），佢重申啲仔女唔會明白曾經被家暴嘅人嗰種恐懼：「嗰種創傷唔係淨係肉體上嘅」，講到咁，連主持人麥長青都要拍吓肥媽個膊頭嚟安慰……
來源:
http://hk.apple.nextmedia.com/entertainment/art/20170623/20066240