ZKIZ Archives

馬會尊重母親節，跑馬日改在星期六，於是左丁山罕有地在五月十三日星期日中午，留在家中，是日有「城市論壇」，題目就係講教科書教材價格。一位講者李慧瓊議員一開口就話教科書好貴，一本小學書賣過百元，仲貴過大作家寫嘅小說。另一位講者係中大金融系教授王澤基（中大畢業嘅 Rhodes Scholar，牛津大學經濟學博士）指整個議題十分無聊，從數字、數據嚟睇，香港教科書行業不存在壟斷及厚利（更唔駛講暴利）嘅問題，不過理性教授遇上一位情緒太太，即係一位樣子甚為富泰嘅家長代表李思傿，就真係有理說不清。睇完第一節，先知道 now635播緊 NBA季後賽， LA湖人對丹佛金塊，連忙轉台，睇緊張嘅 Game7好過。

睇吓波，諗吓香港嘅時事，懷疑特區政府推行政策時，係根據理性政策分析，經濟分析，從數字數據着手，分辨事有大小輕重緩急吖，還是落區聽得多師奶抱怨，基層訴苦就心急行事，向民粹低頭？好似教科書咁，明明只係一個年值十一億元左右嘅市場，在香港眾多行業之中，根本不值一提，講到稅前利潤，攞晒都未必夠在半山買一層豪宅，要賺幾多年先至等於候任梁特首間山頂獨立 house嘅市價？與公屋上樓、土地供應、經濟增長放緩、通脹上升形成滯漲等等大問題比較，教科書價格根本全無優先可言，教育局竟然將教科書煲到成幾日嘅頭版新聞，簡直係同下任政府開玩笑。如下任教育局長真的是傳聞中之人力資源專家吳克儉，佢上任後應該搵佢位中大師弟王澤基攞吓關於教科書嘅意見。鄭大班在報紙撰文講香港應依照英基學校、國際學校做法，每年向學生派發國際通行嘅教科書。鄭大班有所不知，香港特區政府教育局有博士教授級數嘅課程專家，佢地研究設計嘅課程，有香港特色，與國際不同，國際通行之教科書在本地中小學根本不能應用，否則學生在本地公開試一定肥佬！如果本地學校要效法國際學校派書，唔該教育局廢除本地課程先！