日前本欄回覆一位讀者關於「色弱」學生是否可以讀醫科，一位熱心醫生讀者 Dr.
Ng來郵話佢做咗顧問醫生二十年，清楚知道「色弱」（ Color
Weakness）對攻讀醫科無甚影響，色弱學生唔駛因此氣餒而不申請讀醫科，唯一例外就係修讀 Pathology（病理學）可能受影響。
讀者
Arrow繼續來郵講電子書，指左丁山「繼續幫出版界欺負人類文明發展」，意思即係妨礙電子書出版，左丁山豈有如此能耐，首先講明，出版界靠印刷商印書，
彼此關係密切，但出版商印書，總大多數會外判，自己唔會投資印刷機，只有極少數大型出版商係例外。讀者
Arrow話一條龍服務係常識，未必呢，好多年前肥佬黎已經否定做生意一條龍之說（英文所講 vertical
integration），講明製衣廠不應開埋布廠，布廠不應開紡紗廠，今時今日之 Nike何來造鞋廠？
有實戰經驗之人就唔會盲目相信電子教科
書會解決教育及教科書問題，冇人會阻住地球轉唔搞電子教科書，但大搞之前，務請教育局官員搞清楚，區區五千萬元根本無用，徒增浪費，在所有本地學校未有新
電腦、寬頻上網、 Wi-Fi等配套設施及學生有人手一部
netbook之前大力推行電子教科書或電子教學，純粹係做騷而已，美國唔得、英國唔得、歐洲未掂、南韓投放21億美元未竟全功、新加坡未有成功例子之
前，香港要投放幾多資源去搞幾耐先至能完全取代印刷教科書？
微軟有宏圖大計，投資六千五百萬美元，與費城學校區合作，成立一間 School
of the
Future，全校學生使用電腦，不用任何印刷本教科書，在2010年有第一屆高中畢業生，但辦校數年來，飽受抨擊，費用貴啦，學生不懂基本知識啦，唔用
教科書係有害嘅啦，甚至在2009年仍然被報紙批評「未來學校是大災難！」六千五百萬美元（五億幾港元）辦一間全電腦電子教育學校都辦到一頭煙，仲話由微
軟支持㖭，香港要推行全面電子教科書教學，真係要慢慢走，莫亂跑。
