| ||||||
| 世界盃卒之踢 完，唔駛再為咗睇波捱夜，為之鬆一口氣，星期日、星期一連續兩日在凌晨兩點半睇波，第二朝真係頭岳岳，眼花花。國際足協都冇理由嘅，決賽咁大件事，點解唔 編在星期日下午光天白日之下舉行，竟然要打夜波，令到我哋亞洲人冇覺好瞓呀？南非與香港時間相差六小時，香港凌晨兩點半，即係當地時間晚上八時半，倫敦晚 上七時半，馬德里晚上八時半，紐約午間二時半。假如在香港時間晚上十時半舉行，好好多啦，南非只不過係下午四時半，倫敦三時半，正係星期六日睇足球嘅黃金 時間，你話幾好呢，歐洲亞洲人都覺得好方便，而紐約就係早上十時半，里約熱內盧早上十一時半，一樣好啫。 所以左丁山好唔明白賽事時間之編排 邏輯，須知道世界盃乃全球最大之體育商業活動，國際足協成日搵隻眼吼住中國市場，冇理由在賽事時間上故意唔方便中國及亞洲嘅啫。 下一屆二○ 一四年世界盃在巴西舉行，我地亞洲人唔駛睇直播都得咯，假設賽事仍然編排在當地時間下午一時半，四時及晚上八時半舉行，相等於香港時間凌晨十二點半、三時 及早上七時半，點睇呀，唔駛返工咩。本港電視台下屆競投二○一四年世界盃轉播權，如過份抬高價錢，因住蝕本至得，本港茶餐廳及酒吧亦唔慌會好生意。 興 奮過後，諗吓本屆世界盃有乜好睇？以後世界盃史家一定記得八爪魚保羅，預測八場賽事勝負，全中，因每場有主勝，客勝，和波嘅三個可能性，估中嘅機率係三分 一，連中八場嘅機率係656分之一即0.15%，八爪魚居然中晒，問你服未。除咗八爪魚之外，以後大家會記得卡卡、C朗、朗尼、美斯、亨利、派路等等大球 星全部一無所得，令球迷大失所望，球迷要注意嘅係，呢班大牌作戰經年或傷患未癒，在世界盃冇力，來季在聯賽好可能患上疲勞症，繼續演出差勁。巴塞班球星係 西班牙主力，苦拼到底為國奪標，佢地有冇時間休息，等來季西甲開鑼呀？ | ||||||