財金冒險號：「狼來了」實有一次中
1 :
GS(14)@2017-06-18 21:42:25美國又加息，聯儲局預計下半年再加一次、明年加多三次，但有專家批死加唔到咁多，「債王」格羅斯話最多加多兩次，因為經濟及通脹偏低。小生信耶倫！美息加咗四次，仍只得1.00-1.25厘，喺金融海嘯前，只有2003-2004年更低息。嚴格嚟講，未來一年每次加息都唔算「緊縮」，只係「減少寬鬆」。正如揸車轉彎，轉到一半要開始回軚，等轉到正一正至回就太遲，隨時車毀人亡。聯儲局絕對有條件繼續回軚。美國失業率已重回海嘯前低位，通脹雖未達到2%目標，但睇番上次加息周期始於2004年中，最初通脹都低於2%，之後息一路加，通脹卻升足兩年，可見貨幣政策有滯後。耶倫兩年半前坐正，當時個個話佢係鴿派，但佢任內終結QE、進入加息周期、提高加息步伐、部署縮表，一啲都唔鴿，千祈唔好睇少利率上升風險。香港人就最關心加息會唔會拖冧樓市。樓市好友話今時唔同97，因為現時利率低、負擔比率低、按揭成數低、好多樓已斷供等等，啱。但金管局陳德霖都啱，佢話現在利率極低，當樓市上行周期逆轉，好可能遇上利息上升周期（98年樓價見頂處於減息周期），而港元利息遲早會跟美息上升。香港官員近7、8年不斷提醒加息風險、警告樓市泡沫，信者仆直，但叫咗咁多次「狼來了」都冇狼，唔代表以後都冇狼。笑笑生
http://fb.com/sneeringman
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170616/20057459