持股賬面輸過千億 中環在線：格林伯格做對冲執19億 李華華
2008-11-21 AppleDaily
唔 少城中富豪衰喺有「I kill you later」之稱嘅Accumulator（累計認購期權）上，所以一提起結構產品，立即耍手擰頭兼掉頭走。華華噚日聽到花旗國消息話，身家已經大縮水嘅 美國國際集團（AIG）前主席格林伯格，最近就因為早前買落嘅結構產品執番筆，唔知會唔會係否極泰來嘅先兆。
話說3年前，AIG股份仲喺 67蚊美金嘅時候，格林伯格為手上442萬股AIG股份做咗對冲，同瑞信定咗份遠期合約，如果3年後AIG股價低過某個水平，瑞信就要接貨。份合約啱啱喺 星期一到期，當時AIG股價得番1.91美金，唔使多講，當然係瑞信要硬啃貴貨，格林伯格因為咁就賺咗2.4億美金，即係大約18.7億港銀。
3年蒸發過千億
雖 然唔知瑞信要用乜嘢價接貨，不過心水清簡單計計，接貨價較開始價大約有19%折讓，即係54美金左右。今勻瑞信唔見咗十幾億，你都咪話唔傷。不過，格林伯 格都未必笑得出，事關佢手上揸住2.08億股AIG股份，埋單計數，過去3年已經蒸發咗136億美金，唔見咗過千億港銀，做咗對冲嘅比例大約只有2%，今 次袋番十零億都幫補唔到幾多，睇怕格林伯格唔多唔少一定後悔，當初點解唔瞓身做對冲。李華華