ZKIZ Archives


財經評論 :三哥米線變一哥?

1 : GS(14)@2017-05-19 05:40:01

近幾日全香港人的熱話,應該離不開「譚仔」兩個大字,一個值10億的名字。願意以十位數收購譚仔的,是日式烏冬連鎖店丸龜製麵的母公司Toridoll Holdings。個人觀感而言,丸龜製麵其實在香港唔算好出名,成為譚仔的新老闆前,可能譚仔的員工都唔太知佢哋個品牌,丸龜在港分店約11間,與譚仔近50間分店相比,明顯差一大截。收購消息一出後,即時令全香港人都識丸龜製麵,呢十億,已經成功收返多少人氣成本。不少「譚粉」都熱議之餘,連記者到譚仔用餐時,都聽到三幾位員工,即係譚仔阿姐討論緊新老闆。不過,Toridoll就話,未來為加強競爭力,會將為「譚仔雲南米線」品牌重新定位,重塑品牌。其實呢吓嘢都幾高風險,因為譚仔已經深入民心,個名最值錢,客路又極為廣闊,基層、學生哥、白領,當想不到吃甚麼時,就會好自然行入譚仔進貢,拍得住麥當勞。如果轉型,有關成本隨時轉嫁消費者,食品會因此加價,偏離街坊價,市場未必接受到,基層同學生哥隨時say bye bye。至於受益者,高登仔推斷,三哥好快就雄霸米線界,此推測並非無道理。重點是,三哥講明不打算與其他餐飲集團合作,梗係喇,如果譚仔轉型一出亂子,可能香港就得三哥有土匪雞翼等招牌菜,三哥隨時將譚仔原本的客源都吸納埋,隨時盡收天下「譚粉」,呢個時候,絕對一動不如一靜。譚仔三哥米線,隨時變一哥米線。記者:黃嘉銘




來源: http://hk.apple.nextmedia.com/financeestate/art/20170519/20025892
財經 評論 三哥 米線 變一 一哥
PermaLink: https://articles.zkiz.com/?id=333613


ZKIZ Archives @ 2019