【馮仁昭四圍超】家庭公司公開秘密蘭茜老公小三工作情人
1 :
GS(14)@2016-09-23 08:10:03■蘭茜淡出娛圈前，曾為獎門人節目做主持。資料圖片
前商台DJ蘭茜（簡詠嫻）當年憑一棚哨牙，令人印象深刻，又唔介意演醜角，上獎門人節目「刨西瓜」環節絕對冇得輸。又參加過唔少電影好似《買兇拍人》、《千王之王2000》演出，演嘅都係貴婦角色。現實中嘅蘭茜06年淡出娛圈嫁作人妻兼箍埋牙，靚女咗好多，同富貴老公Johnny住喺港島樂活道。不過前日有報道指蘭茜婚姻亮起紅燈，話佢老公同一位身家富裕嘅中年女子過從甚密，有時仲唔返屋企瞓。報道又話蘭茜唔捨得呢二十年嘅感情，所以默默獨守空房，希望老公回心轉意。
■Johnny圈中人緣甚廣，早前亦有出席慧妍雅集活動。資料圖片
「喺埋十幾年」
噚日本報讀者張先生就爆料，透露嗰個女子D小姐（化名）嘅身份，D小姐年約40多歲，外貌不俗，一直單身。D小姐自從01年同Johnny一齊做事之後，仲合作搞生意，成為親密戰友。張先生話：「當時全公司都知道Johnny女朋友係蘭茜，但佢同D小姐嘅關係亦係公開嘅秘密。」兩人賺到第一桶金，之後又合作搞其他生意，仲贊助好多圈中藝人，圈中人緣甚廣。張先生又話：「佢哋兩個喺埋十幾年，D小姐一直冇結婚，得閒拍吓散拖。聽聞蘭茜一直都知道D小姐呢個人存在，而Johnny同D小姐關係好好，成日都會出席佢屋企嘅活動。」撰文：馮仁昭
來源:
http://hk.apple.nextmedia.com/entertainment/art/20160923/19778841