支援人員 人在中環
http://manincentral.blogspot.com/2012/04/blog-post_22.html早排公司打算招聘多一個IT Support，HR問我有冇乜野特別要求。我諗左一諗：「hmmm…其實最緊要脾氣好。」
畢業之後，我短暫地做過一陣子IT
Support既工作。老實講，呢個部門既工作，到呢一刻我都依然認為係吃力不討好。做Support唔係搵錢部門，儘管我認為一間公司冇左
support部門其實運作會好唔掂，但響香港既企業文化底下，呢個部門既地位一直唔高亦係事實。
我記得當時Support
team裡面清一色係男仔，大家都血氣方剛。其他部門經常投訴我地唔合作，效率慢，而且喜歡搞對抗。效率慢我不能認同，但某程度上有「唔合作」既時候，則
確係事實。之但係咁，唔合作既源頭又究竟係乜野？我當時既感受係，我地一班做support既同事，係極度唔受尊重。其他部門既同事，部腦有乜問題，總係
習慣將責任推落你度。總之部腦行得慢唔識郁成日死…總之乜都好，都係入你數。做Support冇錯係being
paid去幫佢地解決呢方面既問題，但係令一班support team手足勞氣既，卻係因為佢地部腦出左問題既時候，佢地會覺得係「IT」既錯。大佬，
究竟大家明唔明白，當你部腦出左問題既時候，最大既原因，係因為作為user既你不適當地使用電腦？俾你催命符咁催上黎幫你解決問題，仲要俾你硬砌一鑊，
唔火就假既。 support team長久以黎都響一個咁既環境同氣氛之下工作，有時「有限度地」唔合作，算係些少心理補償。
部門之間既合作，係建基於一個循環既關係。你對我禮貌一點，感激多一點，自然我又會為你賣力多一點。
然而對負責支援既部門欠缺尊重，我多少覺得係香港地既企業文化，好難改變。我公司既同事知道我以前做過支援人員，我亦經常向佢地要求大家對支援部門既同事
應該禮貌一d，客氣一d，但情況其實還是一樣。總之在我面前，大家說話也許會收斂一些，但在我既背後，總有些同事會八婆上身，
面對住班support同事，說話總是不留情面，一副我尊你卑既姿態。
我自覺無力改變這種文化，公司人少的時候，情況還比較控制得住。人多了，這種問題也就浮現出來。 唯有期望support既同事EQ夠高，可以百毒不侵。
*****
我是這樣離開這一行…
當年做support既時候，遇過一次這樣既情況。公司高層正準備做業績發佈會，殊不知，高層準備做presentation果部laptop突然上唔到
網。仲有幾分鐘發佈會就開始，我地幾個support既同事自然心急到不得了。經過檢驗之後，發現原來係部Laptop既Lan
cable插口有點鬆脫。高層怒不可歇，狂柄我地幾個support人員點X樣做野。我地其實覺得無奈，因為呢個高層果部laptop，平日像國家機密一
樣，從來都唔俾我地部門既人掂。 你部腦我平時連見都未見過，臨時臨急有hardware problem你走黎入我數，唔岩規矩下話？
十幾年前既Laptop係唔興有built-in
Wi-Fi既，otherwise就唔會發生以下既事情。高層發晒爛渣，話無論如何都唔可以響個發佈會裡面出錯。所以佢諗出黎既方法係，叫我地其中一個
support既同事，
全程企響佢隔離，用隻手襟實條Lan線。你冇估錯，佢揀左我。個發佈會有press黎影相同錄影，小弟當日一碌木咁企響老細隔離，自然亦被攝入鏡頭。無啦
啦上左鏡自然有親戚朋友同事睇到，俾人笑到面黃自然在所難免。當日年少氣盛兼且薄皮怕樣衰既我自然覺得氣難下，一怒之下就返屋企打辭職信，從此離開左呢
行。
當然，受得人二分四自然要幫人頂屎。當日忍唔住啖氣亦證明我EQ唔合格。不過當日其中一樣令我最火滾既係，果位高層大吵大鬧話部機上唔到網唔可以接受，要
求我做人肉接駁器棟響鏡頭前面，但當我全程企響老細隔離，雙眼緊盯住Laptop既螢光幕，慌死自己隻手一鬆會害死公司，但我企左成粒鐘，卻發覺高層既
presentation
powerpoint，根本早就存左響部腦既harddisk裡面。發佈會既presentation內容，根本冇一秒鐘係需要用到上網裝置。唔知係個高
層電腦知識太弱，還是我有所誤會，咁即是話，查實根本冇需要有個傻仔棟響佢身邊，而我地之前發晒茅咁幫佢fix部腦既上網裝置，查實都係多X餘。