Kelly冧暈曹敏莉鍾嘉欣囡囡唔慣香港生活狂喊
1 :
GS(14)@2017-04-04 08:59:29鍾嘉欣(Linda)去年與脊醫Jeremy結婚後，誕下囡囡Kelly，並長居加拿大。嘉欣曾透露自己餵人奶，時時刻刻都要照顧囡囡，所以早前推咗部劇，只係間中返港出席活動賺吓奶粉錢。最近嘉欣帶埋BB返港12日，除咗出活動，仲有探班香港班朋友。曹敏莉昨日喺微博貼咗佢同囡囡及嘉欣與Kelly嘅合照，原來佢哋都係人04年中華小姐，Linda攞冠軍，Mandy就得亞軍。Linda喺ig留言﹕「前中華小姐聚會，13年前你代表香港，我代表溫哥華。呢個比賽改變大家嘅命運，我好感恩我哋識到依家，你都仲係咁靚，Mandy你要繼續努力，很開心的一天！」相中見Kelly個樣真係好得意，白白淨，頭髮濃密，而眼仔碌碌，個樣越嚟越似媽咪。曹敏莉留言：「今天跟Linda媽媽過了一個非常愉快的下午！Baby Kelly真係可愛到不得了，It was so nice chatting with you dear!」而Linda早前亦接受咗鄭紹康fb live訪問，獲送贈BB衫，Linda即笑住投訴：「自從有咗之後，我地位都冇晒。」Linda透露囡囡唔習慣香港生活，失眠咗3晚，佢話：「可能有jet lag(時差)，返到嚟成日喊，今日好少少……加拿大超安靜，我哋屋企唔開電視，同老公商量過，盡量都唔會畀iPhone佢睇到，所以佢平時好calm.」被問點解咁快收身？Linda即刻企起身show纖腰，笑言：「餵人奶啦，收身好快。」
來源:
http://hk.apple.nextmedia.com/entertainment/art/20170403/19978780