ZKIZ Archives


趕得切猴年出世吳忻熹順產誕B再做人母

1 : GS(14)@2017-01-26 18:22:16

現年42歲嘅98年港姐季軍吳忻熹(前名吳文忻),6年前嫁畀有「南丫島王子」之稱嘅金融才俊陳劍陵,3年前仲生咗囡囡陳芊彤(Scarlet),佢一直有意再追多個佢,去年成功有孕,預產期係下農曆新年後,腹中B女昨日突然搶閘出世,提早咗成3個禮拜,由雞女變猴女。吳忻熹經過休息,昨晚喺facebook貼相報喜。吳忻熹仲分享咗BB靚相,樣子精緻,同媽咪生得餅印一樣,第二次做媽咪嘅佢留言:「陳施辰Season Chan,趕着出來逗利是,今朝急不及待要趕出來同大家見面,Season好合作,朝早7點幾穿水,媽咪喺屋企慢慢執嘢,冲埋個涼,成9點幾先去醫院,入到醫院原來已經開到3度,10點幾11點打完無痛已經開到7-8度,11點半等到醫生來開始生,12點就出世了!今次笫一次試順產,真係順利到不得了!原本是雞女的你,原來你是一隻馬騮女!Welcome to our family n wish u healthy n happy ever after!!!」相中所見剛剛生完嘅吳忻熹臉色紅潤,好精神,然做咗家姐嘅Scarlet好開心,係咁護住妹妹,好有家姐仔風範。《蘋果》昨晚致電吳忻熹,佢好興奮話:「今朝穿水,同時有陣痛,我上一胎係剖腹,未試過順產,今次仲一早book定開刀,估唔到係順產。」囡囡提早出世,趕住逗利是唔蝕底,但咁樣係咪打亂媽咪陣腳,佢話:「我其實都未買齊啲嘢,但OK啦,今日順產好快,好開心。好彩我搵定咗陪月,同佢講咗我可能會早生。」由於囡囡早產咗成3個禮拜,佢體只有5磅多,但好健康,母女平安,明日仲可以趕及年三十晚返屋企,一四口團年迎雞年,恭喜恭喜。




來源: http://hk.apple.nextmedia.com/entertainment/art/20170126/19909546
PermaLink: https://articles.zkiz.com/?id=324283

Next Page

ZKIZ Archives @ 2019