📖 ZKIZ Archives

業績簡評 - 聯亞集團 (0458.HK) PARTIPRAL 派得好

http://partipral-hk.blogspot.com/2012/03/0458hk.html

聯亞去年營業額32.8億, 同比微增8%; 一如去年, 生意下半年做得比上半年好, 主因係零售業務有季節效應, 旗下品牌JACK WOLFSKIN主打冬天衫; 而NAUTICA冬季衫亦會賣得較貴. 毛利率進一步提升至歷史新高31.5%, 始終目前零售分部所佔整體銷售比重日益強大, 加上中期業績亦中已預告, 今期毛利率能夠進一步擴闊應該不算意外驚喜.

上半年引以為傲既成本控制下半年有轉弱跡象, 由於零售分部業務持續擴張, 相關廣告, 推廣及專利權費用亦相應增加, 銷售開支佔營業額比例比過去數期業績明顯增加, 差額約3千萬; 行政開支 (即一般管理費用) 問題反而不大, 主要都係上半年增加, 下半年已見受到控制.

分部業績方面, 由於有季節性效應, 適宜每半年作比較. 零售分部持續愈騎愈有, 下半年營業額5.8億, 同比上升近50%; 環比增幅亦達44%, 溢利9千4百萬同比爆升1倍以上; 環比亦增近1.5倍. 管理層指出今期內地銷售點增加超過200個, 要留意中期已經增加左115個, 即下半年銷售點增長大概係85-100個左右, 而以目前總銷售點已經超過600個計, 近年增長速度仍然相當驚人.

比較相形見絀既係製衣分部表現繼續令人失望, 收入, 溢利持續萎縮, 雖然全年計分別不大, 但若以每6個月比較, 倒退之勢相當明顯.  早年見佢賣廠, 仲以為想逐漸淡出製衣業務, 但今期管理層所俾既指引係未言放棄, 相信將來業績繼續受到此分部拖累既機會仍然相當大.

存貨大增1億, 比較惹人注目, 但同時現金又大升1.6億, 今期現金流應該比去年強. 銀貸無增加, 淨現金提升至4.3億, 最主要係因為業務轉型, 今時今日既聯亞財政上比以往更穩健.

估值方面, 2011年核心盈利2.15億, 同2010年1.5億比較增幅達4成以上, 雖然跟2010年比較, 實際盈利增長金額貢獻基本上全來自上半年; 但始終覺得聯亞近年轉營零售發展得非常成功, 既然此分部表現繼續令人驚喜, 今期業績整體上仍然收貨有餘. 不過, 下半年派息只得$0.22則令我有點意外. 雖然名義上派息率4成繼續保持近年作風, 但以去年末期息$0.24作指標, 今期竟然派少左, 不得不承認我係有多少失望.

核心盈利2.15億即每股賺$0.796, 現價$4.71即P/E 5.9倍, 息率達7.9釐, 估值仍然不貴. 但既然管理層無提升派息率, 市場亦無必要立刻提高估值. 同埋都要重申多幾次, 聯亞零售業務透明度仍然係相當低, 此點亦有礙重估進度. 我對此業績看法傾向中性, 繼續持有會係比較合理做法, 但由於跟原先估計, 希望績後能觸發市場重估既想法有多少偏差, 日後可能會酌量調低持倉比重 (目前佔組合比重係39.5%).

PermaLink: https://articles.zkiz.com/?id=32301
Next Page
ZKIZ Archives @ 2019