ZKIZ Archives


【有骨氣靠自己】癱而不廢包山王照爬獅子山毋忘初衷

1 : GS(14)@2017-01-14 07:54:34

志偉嘅囝囝十足爸爸一樣咁活躍!



「呢一樣嘢可能好多daddy都做到,但係呢一樣嘢,到我個仔依家4歲幾喇,我都仲未做到。我係好想第一個動作就做到呢一樣野,抱住個仔企起身,轉幾個圈。」黎志偉,曾經係一名全職運動員;2008年更以10秒極速爬上長洲太平清醮嘅包山頂,成為「包山王」。自認係運動都啱嘅志偉,亦係首位奪得亞洲極限運動錦標賽冠軍嘅香港人。不過好不幸,一場交通意外,令佢從此連企都企唔到:「5年前喺屯門公路遇上咗一個交通意外,導致到我嗰個脊椎第11節第12節嘅神經線撕裂晒,斷開晒,完全一個半身癱瘓人士。」



爬獅子山當日,正正就係意外的5周年(受訪者提供圖片)

訪問當日,志偉即場示範只靠雙手去攀石

點解個天要咁玩我?發生不幸事,我哋最鍾意問個天;但係志偉冇諗過呢個問題,佢只係諗到當時懷住8個月新孕嘅太太同埋即將出世嘅小生命:「我有好頹,當其時真係好似一個廢人一樣。以前我成日爬得好高,睇嘅嘢基本上都係喺人地頭頂嘅,依家係坐住喺輪椅,甚至乎講嘢都抬高個頭同人哋講。正正當其時就係我太太都有左8個月嘅新孕,當其時唯一一個生存動力就係好想見到個仔。」一個小生命嘅來臨,令志偉決定唔再頹!佢開始做番運動,Boxing﹑劍撃﹑攀石……甚至只靠一雙手去爬上獅子山山頂。



志偉憑住堅持同鬥志,終於成功登上獅子山山頂!(受訪者提供圖片)

雖然下半身癱瘓,但志偉冇放棄運動,連boxing都玩埋(受訪者提供圖片)

「我爬獅子山就正正係交通意外5周年,成個過程係難處理o架,亦都有諗過不停問自己嘩咁辛苦做咩呢搞呢壇嘢?但又諗到起碼都有30幾40人去撐我,支持呢件事,咁就真係認認真真去做靚啲件事。」呢次壯舉,終於感動到外國廠商,願意出售機械腳,但經費最少要2﹑3百萬港幣。唔少熱心網民都好想幫助志偉企番起身,發起眾籌。不過志偉決定要繼續靠自己:「捐款或者眾籌,我都唔係第一個考慮。雖然係半身癱瘓啫..但係其實都仲有少少能力嘅,咁我就唔想就咁樣接受人哋啲捐款,幫我完成企番起身一個個人嘅心願。」靠自己講talk同出書,鼓勵到人又幫自己,或者呢種鬥志就係香港人。獅子山精神係咩?黎志偉話:「點解我要爬獅子山呢?想提提大家,乜嘢叫做獅子山精神。新獅子山精神係代表無論外在環境因素點樣影響都好,其實你都要毋忘初衷,排除萬難,做番自己做人嘅嘢,或者係活出你人生嘅態度。」採訪:植詠珊(Cathy)攝影:Kaman﹑Meng剪接:Roy編審:Kaman




來源: http://hk.apple.nextmedia.com/entertainment/art/20170113/19894818
PermaLink: https://articles.zkiz.com/?id=322524

Next Page

ZKIZ Archives @ 2019