ZKIZ Archives


《中佬手記》球證判決惹爭議,巴西技遜實無疑 得個跑字

http://solelyrun.blogspot.hk/2014/07/blog-post_13.html

《中佬手記》球證判決惹爭議,巴西技遜實無疑

世界盃季軍戰,一向被視為雞肋戰,就連荷蘭教練雲高爾都話,根本就係令球員尷尬嘅一場波。歐洲國家盃就冇話爭第三名咧。但可能我先入為主 (睇世界盃先於歐洲國家盃),一個賽事有第一、第二,都應該有個第三丫。唔係啲銅牌要做雙份?

雲高爾教埋呢場就去曼聯報到,巴西教練史高拉利就話希望季軍戰之後先算。兩位老牌教練都一如所料擺出強陣,其中巴西都換咗好幾多人,包括用麥士維取代上場罪人之一嘅馬些路,用返保連奴棄用費蘭甸奴,用返車仔中場線拉美利斯、奧斯卡同韋利安,最前面用祖奧代替費特 (雖然效果應該差唔多) 。荷蘭方面,尼祖迪莊睇嚟都係未好返晒,出咗佐迪卡拉斯,史尼迪操練時受傷,由迪古斯文代替。

原本以為巴西有返隊長泰亞高施華坐鎮後防就冇事,點知第一個出事嘅就。開波分半鐘,可能好多人杯麵都未淥好,佢就響禁區邊落手拉單刀嘅洛賓。呢個時候,洛賓梗係搏老命都入多兩步先喺禁區跌啦。人同此心,唔好話我聽你唔會咁做呀。球證吹雞直指十二碼點,加送一張黃牌畀巴西隊長。其實都算幾畀面,如果跟足球例,直接領紅返更衣室沖涼啦。但開波未夠兩分鐘,球證酌情鬆手少少就少少係啦。

雲佩斯今場繼續正選,射十二碼嘅首選就梗係佢啦。 (雲高爾話準決賽有兩位佢覺得最好波嘅在場球員唔肯射頭輪,搞到佢要搵維拿 [又譯華亞] 去射,結果……) 呢位曼聯射手射龍門左上方死角,祖利奧施薩捉到路都飛唔到。射十二碼,識射一定係咁射。

巴西落筆打三更,喺鄉紳父老面前焗住進攻,荷蘭亦樂得縮後防線等你嚟,反正照舊三扒兩撥畀洛賓反擊就係。不過當你見到最前面嗰個係祖奧嘅時候,你都知「糟!噢!」係必然嘅結果。巴西攻唔入,到 16分鐘又失多球。當時荷蘭嘅迪古斯文喺有越位嫌疑之下右邊落底傳中,拼命三郎大衛雷斯上完前面助攻,又爭住返落嚟頭槌解圍……可惜佢唔係頂出底線而係頂向禁區頂 (大佬你漏畀馬爾干解圍都仲好啲) 。於是,白蘭特喺十二碼點附近控定、控定再睇定……忘記了世界這分鐘……咁滯,先較啱右腳射球掛網波,古斯達禾仲未撲埋到嚟,咁就兩粒咧。

主辦國啲球迷大概哀莫大於心死,情願玩人浪自娛下好過。跟住奧斯卡終於喺禁區邊有腳似樣嘅射門,但係射得太正畀基利臣救出。領先兩球嘅荷蘭下下都九個人返後防守,就算輸反擊都不惜出啲小動作嚟阻止攻勢,最多咪攞黃牌。巴西於是又多咗好多罰球攻勢,最近近磅嗰球喺右邊斬埋去,門前嘅保連奴同大衛雷斯漏晒。當然,你可以話大衛雷斯畀人拉衫嘅。但球證喺兵荒馬亂之間,其實好難睇到啲咁細微嘅動作。

半場巴西落後兩球,淨低半場波畀佢哋自我救贖。但好肯定嘅係,大衛雷斯喺後面做嘢打爛嘢,成日推個波上前場,唔係亂斬就係短傳畀隊友然後自己走入去塞埋個空位,搏晒老命想要將功補過,一腔熱血結果反而累事。都話足球係團體運動咯,下下英雄主義,你估八十年代咩。 (有請 Cookies 領唱……)

下半場出返嚟,巴西換咗走保連奴,換入殺人王費蘭甸奴 (仲記得占士洛迪古斯點樣畀佢熱情款待) ,結果佢出到嚟不負所託,先後鏟低雲佩斯、箍頸阻止洛賓搶波……喺荷蘭繼續重視防守多過進攻嘅情況下,巴西可以話係狂砌荷蘭。不過,當你見到最扭得嘅當然係工兵拉美利斯同右閘老將馬爾干嘅時候,你會知道巴西出咗咩問題。

巴西本來有一個應得嘅十二碼。奧斯卡喺禁區入面畀白連特閘低,慢鏡顯示白連特完全掂唔到個波,但就截低咗奧斯卡。不過,唔知球證睇到啲乜,旁證又唔提場,最終決定係奧斯卡插水領黃牌。冤枉呢。不過事後亦有人話奧斯卡專登伸隻腳白連特踢跌,係插水。你問我呢,我就覺得後衛喺禁區入面出腳一定要好小心,截唔到波又勾到腳,唔輸十二碼算你大命。

另外,白連特喺呢個攔截之後,懷疑因為膝頭哥撞到而要擔架抬出場,由贊馬特入替,又調返古積特返左邊。講開古積特,呢位沙場萬能老倌真係唔話得,前鋒到翼鋒到翼衛都踢得,呢啲咪襟撈囉。

荷蘭本來去到後段都不為以甚,但巴西搏命爭入波又喺後面曝露出咁多空位,荷蘭補時階段一個反擊,贊馬特右路出波畀後中嘅韋拿杜姆攝近柱入。費蘭甸奴包到咁深托咩。三比零,令巴西創出一支球隊喺世界盃失球最多嘅紀錄: 14 球。雲高爾都好識做,最後一個換人名額留第三門將禾姆,同時畀正選門將基利臣功成身退。

巴西隊喺 2014 年嘅災難式結果,應該真係夠後世遺忘 1950 年舉辦世界盃而決賽飲恨嘅傷痛。至於荷蘭,繼上屆成為亞軍,今屆亦都保住季軍,雲佩斯、洛賓同史尼達一代勢將淡出,下屆世界盃要靠迪比、白連特等 90 後,同埋邊個教,有冇能力團結向來有性格嘅荷蘭球星,都係一大堆問題。雲高爾囉喎,我梗係期待佢喺曼聯執教會有咩新景象啦。
PermaLink: https://articles.zkiz.com/?id=107961

Next Page

ZKIZ Archives @ 2019