【白事大過天】韓國人妻喪禮去不停 畀奶奶掟鹽辟邪
1 :
GS(14)@2017-01-07 07:08:12李棟旭喺《鬼怪》飾演地獄使者，工作非常忙碌，要喺亡者嘅死亡地點等候接走佢哋。（《鬼怪》截圖）
【三個粉絲追韓劇】熱播韓劇《鬼怪》經常談及死亡，李棟旭飾演嘅地獄使者亦相當繁忙，要預早到亡者離世嘅地點接佢哋，而同一時間，原來亡者家屬都忙個不停。《鬼怪》第一集講恩倬媽媽過身，當晚三神奶奶就嚟交帶恩倬話，「過咗今晚子夜，有兩女一男會嚟喪禮場地搵你，你跟佢哋走！」意味恩倬即晚就要為媽媽辦喪，而一般舉殯地點會喺醫院地牢。
家屬都同樣忙，好似劇中恩倬媽媽過身，恩倬要即刻趕去醫院。（《鬼怪》截圖）
三神奶奶仲嚟交帶佢，當晚要喺喪禮場跟姨媽走，意味韓國人嘅喪禮係即日搞。（《鬼怪》截圖）
韓國喪禮一搞搞三日，第一日通知親友，第二日弔唁，第三日出殯。
港人Elaine嫁咗畀韓國人Kevin十年，介紹韓國喪禮係一連三日舉行，第一日家屬通知親友，有人會即日到場，第二日亦全日畀親友弔唁，第三日出殯。因此，每次收到喪事消息都係非常趕，Elaine話：「有時老公放工前打嚟，話邊個邊個同事嘅屋企人過咗身，要去喪禮。」由於每次都事出突然，老公Kevin話會擺定一條黑色領帶喺車上，以備不時之需。
港人Elaine嫁去韓國十年，話已經去過至少十次喪禮，上個月又去老公Kevin嘅同事嘅親戚嘅喪禮幫手，該同事回禮致謝（右圖）。
Elaine話有少少關係都要去喪禮，就算係公司同事嘅親戚，根本未見過都要去，而作為太太仲要幫手。（《回來吧大叔》截圖）
喪禮上，來賓會即席食飯飲酒，甚至有啲會玩花牌。（《請回答1988》截圖）
無論係因為自己親友，定隨老公而行，Elaine已經喺韓國去過約10次喪禮，老公Kevin仲話自己去過約30次。Elaine話成日去喪禮係韓國人嘅特色，「基於尊重同情義，有少少關係都要出席喪禮，就算係朋友嘅父母，我未見過都要去。」而某程度上，韓國人出席喪禮亦係職場需要。由Rain主演嘅《回來吧大叔》第一集就講到，主角金英洙生前為打好份工，就算同老婆慶祝緊結婚周年紀念，一收到上司電話，話某同事嘅叔叔辦喪事，就即刻帶埋老婆去喪禮場地幫手。作為韓國人妻嘅Elaine都話，跟隨老公去喪禮，唔可以就咁坐喺度，「要幫手執好上司啲鞋，招待其他人，有人走咗要執嘢等等。」
以前家屬係自己準備食物招呼來賓，o依家由殯葬公司代辦，輕鬆得多。（《請回答1988》截圖）
喪禮嘅食物通常有辣牛肉湯，傳聞話係辟邪，但Kevin話無關係，只係方便分發。（《請回答1988》截圖）
韓國人去喪禮，服裝上同香港人一樣，要着黑色或深色衣服，亦一樣要畀帛金，放入白色信封內。Elaine話韓國人畀帛金通常由五萬韓圜起，約350港元，「但係無尾數，家屬亦唔會回返啲乜嘢。」喺喪禮上，來賓唔係幫手摺金銀元寶，而係即場飲酒食飯傾計，甚至會玩花牌。喺韓劇《請回答1988》嘅第二集，成德善趕到嫲嫲嘅喪禮，見到啲人玩花牌玩得好開心，就講咗句：「咁係辦喪事咩？點解感覺似辦喜事？」
韓國人無咁迷信，遇白事時，無話家屬唔食得牛、三個月唔去得人哋屋企、一年內唔搞得婚禮等，只係棹忌白事唔好撞紅事。
Elaine話韓國人都會畀帛金，一樣用白色信封，有趣嘅係，畀人情都係用白色信封，話代表純潔。
老公Kevin講到有人會喺喪禮玩，都感到有啲尷尬，話大家千祈唔好誤會係不敬，佢話：「韓國人覺得大家一齊分擔傷心嘅事，可以幫對方減少傷痛，所以會喺喪禮留一段好長時間陪伴家屬，而為咗令時間好過啲，就會玩下花牌，飲下酒。」同時，家屬亦為咗好好招呼來賓，忙住準備大量食物。睇韓劇《請回答1988》就知道喺80、90年代，喪禮喺家中舉辦，家屬要不停煮大量食物，o依家就有殯儀公司代辦，家屬輕鬆得多。而喪禮上嘅膳食通常都有辣牛肉湯，據聞係因為紅色可以驅魔，不過Kevin就話唔關事，「整辣牛肉湯、年糕、煎餅等食物，只係因為傳菜同分發比較方便。」對於遇上白事，韓國人不太迷信，無話家屬唔食得牛、三個月唔去得人哋屋企、一年內唔搞得婚禮等，只係棹忌白事唔好撞紅事，同埋去完喪禮後要「被鹽灑」。Elaine話佢哋兩公婆試過去完喪禮返屋企，喺門口畀奶奶用粗鹽掟，Elaine笑住話：「唔粗嘅鹽都唔掟喎，係咁掟，係咁掟，仲一路唸咒語。」雖然Elaine同Kevin都話嗰刻感受唔太好，不過老人家都係唔希望有衰氣跟入屋先咁做。場地提供：韓冰(한빙)地址：仁川富平區體育館路38歲月大廈201號(인천부평구체육관로38세원빌딩201호)電話：032-527-0120主持：動主播阿仙、viu韓劇導賞員Ruby記者及繙譯：卓惠媛(Joyce)攝影：陳家文、李錦鏵《鬼怪》片段由Viu提供：
https://goo.gl/nVkiGe【三個粉絲追韓劇】
http://hk.apple.nextmedia.com/enews/animation/kfans/
來源:
http://hk.apple.nextmedia.com/entertainment/art/20170107/19889017