【動大事2016】喜事當旺！大劉單身24年娶甘比做劉太
1 :
GS(14)@2016-12-27 12:32:072016年喜事特別多，拍拖、結婚、生仔都可以話係人生開心三步曲：先講拍拖，白只、顏卓靈同Jeana、翁子光都係拍片結情緣；但講到放閃放得最勁，就梗係要數楊明同莊思明呢一對喇，佢哋自從宣佈拍拖之後，就索性齊齊出活動賺情侶價搵多啲；而郭富城同Moka呢pair，更開始有老夫老妻feel，任影唔嬲。而最神秘嘅，莫過於李澤楷同港姐季軍郭嘉文，佢哋畀人影到同遊日本，但對拍拖一事依然好口密。今年結婚、擺酒嘅藝人，更加要由年頭數到年尾，吳奇隆與劉詩詩、林心如與霍建華、楊怡與羅仲謙、舒淇與馮德倫、王賢誌與同性密友Kevin Chow、熊黛林與郭可頌、楊愛瑾與郭永淳、岑麗香與強強等等等等.....最開心就一定係劉鑾雄同前妻寶詠琴離婚後，單身咗24年後同甘比結婚。而生仔最密手嘅，當然要數3年抱3嘅陳豪同陳茵媺，仲有5年抱4嘅陳浩民同蔣麗莎兩對夫婦，而54歲嘅杜德偉亦喺今年圓心願，一索得男；而揀咗結婚生仔一條龍服務嘅，就有鍾嘉欣同李蘊，兩人都係去年底結婚，今年初補擺喜酒，年中仲生埋囡囡，各自組成三人家庭，圓滿人生！
來源:
http://hk.apple.nextmedia.com/entertainment/art/20161227/19878139