ZKIZ Archives


《幕後》結局翠如BB橫屍街頭演戲萬用表情被批

1 : GS(14)@2016-12-11 14:12:50

終於到大結局喇,唔係講緊梁振英個任期,而係大台劇《幕後玩家》!黃宗澤(Bosco)惡人有惡報,俾翠如BB用半年時間鋪路毒死,翠如BB喺ICU同Bosco坦白一切,結果係Bosco死唔眼閉。至於其他角色呢?龔嘉欣就同咗鄭子誠一齊,而張繼聰就同鄧佩儀有情人終成眷屬。而翠如BB喺最尾約番蕭正楠喺大會堂出面相聚,不過就俾Bosco舊愛劉佩玥截停,狠狠咁連桶咗肚腩三刀橫屍街頭(應該係死咗),蕭正楠只係呆呆咁拎住紮花,喺事發現場附近癡癡等緊翠如,完全唔知翠如出咗事……翠如BB反應迅速,喺大結局一刻就喺facebook撰文,分享佢對自己點睇呢個角色,佢話:「顧成雙,她打從心底裏從來不覺得自己是一個壞人,她有自己的理由:生存的理由,致勝的理由,愛與恨的理由。在她的世界,從來只有她自己,她不需要別人的理解,認同和分享。有人覺得她是一個悲劇,有人覺得她非常可惡,但對於她來說,這就是她真實的人生。選擇,決定了命運。命運,決定了選擇。」唔少網民都留言讚佢演得好。之前翠如BB俾網民笑佢唔識演奸人,木無表情,無論係開心、嬲、懷疑等,都係用一個萬用表情。其實成套劇翠如BB經歷好多風風雨雨,由見番舊愛、同家姐鬥法、細佬跳樓,再忍辱負重嫁俾Bosco,人生咁大起跌,但可能翠如個角色設計比較內歛,為求保護自己(梗係,佢有個咁變態嘅家姐陳煒…),所以嚟嚟去去都係一個樣……估咋下。但就有高登仔衰衰咁用笑佢根本就得笑同唔笑兩種演繹方式,亦有人讚佢「呢啲叫喜怒不形於色呀你知咩」、「我覺得佢長期都係強顏歡笑同埋把聲冇乜起伏」、「啲戲好到用同一種表情就表達晒咁多種複雜情緒,好屈!」其實前晚翠如BB做得都唔錯,喺ICU向Bosco講出真相嗰場,唔再係喜怒不形於色,睇到有啲心寒;結局俾劉佩玥插嗰下亦相當出人意表,但仍然好「內歛」。




來源: http://hk.apple.nextmedia.com/entertainment/art/20161211/19861939
PermaLink: https://articles.zkiz.com/?id=319208

Next Page

ZKIZ Archives @ 2019