ZKIZ Archives


歐盟凡事管 左丁山

2012-3-11  AD

星期五講及法國新移民來港,原來法國人怕咗社會黨總統候選人 Hollande提出之「富人稅」,稅率高達 75%,豈只有錢人紛紛鬆人,中產專業打工仔亦不能不計劃離開巴黎,去邊呀?近近地過大海去倫敦囉,現在已經有三十萬法國人住在倫敦,有埋電台㖭,叫做 French Radio London。
社會黨未必贏到薩爾科齊,但薩爾科齊弊在唔係純種法國人,法國選民對佢有一種說不出的不喜歡(或者陶傑 說得出),故此荷南迪本來有機會嘅,點知政客就係鍾意見人說人話,見鬼說鬼話,一月份時荷南迪講過:「懲罰性稅率不會帶來更多稅收」,甚受歡迎,大有獲選 希望。點知前星期就提出向超過一百萬美元嘅收入徵收 75%邊際稅率,如果計埋其他稅項及政府徵費,超過一百萬美元嘅收入等於全部奉送咗俾政府,打工仔搏嚟做乜,花紅冇晒意義,高薪人士唔走有鬼。
歐 洲人幾鍾意自稱以公義公正,不時訂下管制法規,要納稅人遵守,結果就係管得太死沒希望,最近歐洲爆發雞蛋荒危機,原因係歐盟要伸張動物權益,今年起不准農 場用一層又一層嘅雞籠養雞,要有足夠空間俾啲雞隻活動,西班牙雞農冇錢安裝新式雞籠,索性殺雞賣錢,不再生蛋,於是倫敦超市雞蛋價錢由四十幾便士一打上升 到九十七便士,以後蛋糕、雪糕會漲價;歐盟要向其他地區飛機徵收排放稅,中國、美國、俄國一起抗議,中國下令中航拒交,以後可能有貿易戰,依家歐盟話歐洲 企業嘅女性董事比率偏低,提出到 2020年女性董事要佔 40%。此議一出, 24個成員國勞工部長反對,三國(奧地利、荷蘭、比利時)無異議,其實女性大學生數目在全世界都開始或已經超過男生,女性在商界佔高職,只係時間問題,駛 乜立例呀?最怕有啲香港人凡事都話歐盟夠進步,歐盟乜都好,要香港學習,跟風,咁就搵嚟搞。一個政府大有為嘅話,最後受難者其實係人民,逼得人民用腳嚟投 票,好似法國精英移居倫敦一樣。

PermaLink: https://articles.zkiz.com/?id=31752

Next Page

ZKIZ Archives @ 2019