ZKIZ Archives


【毅行有心人】69歲參加者 行完100公里上山執垃圾

1 : GS(14)@2016-11-24 07:41:34

Raymond玩完100公里,只休息了一晚就率領Susan及Tristina來到毅行第9個檢查站,由大欖涌水塘步行至毅行終點大棠度假村,執沿途垃圾,全長12.1公里。



「年紀最大,不是最無能力嘛!」羅小韜(Raymond)呢句我可以證明。69歲健步如飛,剛走完毅行者100公里,休息一晚竟然再到線道執垃圾,屆復屆,已經持續這個習慣9年,有心有力,認真老而彌堅。跟着他與義工上山的記者與攝影師後生佢一大截,有幾段路被拋離甚遠。如果佢係一部車,我哋連佢車尾燈都見唔到。



羅小韜是退休建築師﹐2001年首度挑戰毅行者,與外展學校訓練課程的同學組隊參加,從此變成捨不得戒掉的癮,行過返唔到轉頭。「行完覺得幾有意義,可鍛鍊身體,又可認識香港郊外,又幫到樂施會籌款。」計番Raymond當年都已經50幾歲,做出33小時成績還算不錯,但他計計計,發現當中有7小時用咗來休息,又捱了兩個晚上,攰到唔識講,但佢沒被嚇退,反而下定決心,翌年成績定必要減少7小時!原班人馬上陣,第二年果然26小時搞掂,講得出,跑得到。「之後再提高難度至24小時,追到2009年先追到超毅證書,可以話係中晒毒,上曬癮。」Raymond口中所講的「超毅證書」,即超級毅行者證書,要於18小時內走完100公里的人才有。年過六十,他的成績都可謂相當驚人。


練過太極教新手放鬆

很多毅行者都是負傷捱住完成,辛苦到哭泣。Raymond練過太極,他認為對減少摔倒很有幫助,之後他又參加香港遠足覓合團,跟山友組織行山團,學習如何避免抽筋、嘔吐、膝頭痛,還積極培訓新手。「我好有興趣訓練新會員﹐好似今年我三位隊友都係新手,佢哋雖然有跑山跑馬路,但未試過玩毅行者。」
Raymond會教他們放輕鬆,不要緊張。「緊張會抽筋﹐腸胃也可能不舒服。」他又提醒上山落山、上落樓梯,膝頭別扯直,要微微屈曲,衝擊沒那樣大,膝頭便不會痛。他今年的隊伍好國際化,隊友都是毅行新鮮人,包括同樣為長者的Ming、二月誕下第三胎,極速回復鋼條身形的美國人Lauren,以及23歲印度後生仔Islam﹐隊名叫扶老攜幼,好貼切。不過由於他們都要上班或照顧小朋友,所以全隊操練只此一次。「很多時候是兩個或三個人練。一定要全個路線練兩次,分段練習。去年我練得太少,本來預計20小時完成,但最後20公里跑唔郁,只能急行,拖慢隊友,要21小時才能完成。」Raymond跑山多過記者行路,經驗豐富,但年紀有時的確是障礙。「千萬唔好冷親同傷,我哋年紀大,一傷要8星期才能復原。」今年Raymond與兩名隊員以23小時24分鐘完成賽事,可惜最後生的Islam完成7成路段後膝頭劇痛,要無奈退出,所以最終只得三人衝線。


賽後行多12公里執垃圾鬆關節

一如以往,完成賽事後稍為休息,Raymond便會率領義工回去賽道執垃圾。他笑說:「幫手的義工,我諗我都係年紀最大,無所謂嘅,自己行得走得咪做下。」他更謂這樣走動、屈屈膝頭彎彎腰,能加快復完速度。「英文叫active recovery,即係唔係坐响度唔郁,搽油等佢自己好番,比賽完拉筋都係唔夠的,執垃圾好處係可以鬆吓關節。」他和兩位香港遠足覓合團義工負責清理大欖涌水塘至大棠度假村一段,全長12.1公里。「執垃圾最初由2008年開始,我自己帶着朋友幫樂施會執一兩段賽道,後來2011年跟大會聯絡,擔保幫佢哋執晒所有賽道,變咗官方清潔隊。」他們一行人會輪流執,提高效率,否則步伐會慢。今年山路垃圾不算多,可能由於大會今年不再派紙杯,還送不鏽鋼杯予參賽隊伍。「往年喺檢查站附近通地白紙杯,要走到500米至1公里外先見唔到。選手邊行邊飲,然後就順手丟掉。今年唔派真係少咗好多垃圾。」雖然大會樂施會派發的能量食物都有選手號碼,也有罰則不讓隨地丟垃圾的人再參加賽事,但沒公德心的大有人在。「有啲人唔理,我只係參加一年,你執到唔比我明年參加,我都唔理,嗰啲丟慣垃圾仍然會照丟。」自私選手隨手一丟,就要人義務幫你執手尾,公平咩?自己垃圾自己帶走,好基本吧!記者:葉青霞、梁慧琳攝影:劉永發、周芝瑩



懸崖邊的垃圾要二人手拉手合力才能夾起帶走。沒公德心的人有沒有羞恥心?

金山鄰近大埔道,垃圾可能是支援隊給參加者剩食。如果清潔工人來不及清理,有可能惹來猴子覓食。

今年大會鼓勵參加者自備容器,更送出不鏽鋼杯,今年更不再派紙杯,減少大量即棄垃圾。(相片由 watermelon indl提供)


香港遠足覓合團今年派出近80人於毅行者賽道麥理浩徑執垃圾。

69歲的羅小韜(右一),帶領首次參加毅行者的隊友,包括只有23歲的印度人Islam(右二),三子之母Lauren Decoff(左二)、及同為長者的Ming,體現隊名「扶老攜幼」的精神。

羅小韜及兩名隊友今年用23小時24分鐘完成100公里的賽事。




來源: http://hk.apple.nextmedia.com/su ... t/20161124/19843504
毅行 有心人 有心 69 參加者 參加 行完 100 公里 上山 垃圾
PermaLink: https://articles.zkiz.com/?id=316862

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019