📖 ZKIZ Archives

變色狼 左丁山

2012-2-29  AD

星期日本欄引述二千一百年前羅馬嘅選舉秘笈（台灣譯本名「贏了再說」），內有一條守則係要做變色龍，對人講人話，對鬼說鬼話。交稿之後，「爽報」李怡專欄寫「如假包換變色狼」，內有云：
「梁在政綱中提出一年內完成政府定下五年建公屋數字的一半，他要大建居屋，他要增加長者生果金一倍，他要支援新移民，支援移居內地的港人……保守嗎？工商界怕他的房屋政策打擊物業市道，怕他為取悅基層而走社會福利路線，這是除了怕他狠辣報復之外的另一不支持他的原因。
不過，梁突然自稱他的福利政綱保守，就更可怕了。為提升民望，他可以向基層許下種種『支援』的諾言；現在為討工商界歡心又說自己的社福政策比唐保守。真是如假包換的變色狼。」
唐 英年如果話讀過「贏了再說」，恐怕幾難令人相信，但以梁振英陣營嘅競選手法觀之，佢地似乎已經將「贏了再說」背誦如流，背到滾瓜爛熟，一舉手，一投足，都 有呢本秘笈嘅招數嘅影子，可見事先工夫準備十足，唔信大家可以買本書嚟睇吓。睇落，梁振英已有十年磨劍，十年卧薪嘗膽嘅準備，尤其是最近七年肯屈居曾蔭權 之下，做行政會議召集人，忍曾先生脾氣忍足七年，一切看在眼裏，記在心裏，留番今天先至做嘢，可謂耐力驚人，忍功蓋世，一旦反枱，就要見血封喉！
曾 蔭權為官近五十年，由 EO（行政官）做起，對官場行事準則瞭如指掌，其個人價值系統與梁振英唔同，佢兩位大哥傾偈唔埋欄，在官場與中環，有邊位高層唔知呀，大家只係奇怪曾先生 點解願意接受梁先生為行政會議召集人啫，唔通佢無法子搵到適合人選？抑或有啲中環人猜度咁，梁生嘅地位相當於香港特區區委書記，與重慶（直轄市）市委書記 薄熙來同級，曾先生係冇得揀？呢啲純粹係猜度啫，以前冇人敢大聲問一問，但最近見到曾特首臨離任咯，先至搞出滿城風雨，行藏全部俾有心人捉到應一應，爆料 時間遲不遲，早不早，近乎完美，恰好就在西九門文件出現前，不禁令人懷疑，聰明一時嘅曾先生在明，最後都係敵不過在暗嘅苦心人！

 

大家是否記得， 2003年廿三條立法鬧到全城混亂，支持廿三條人士最口響嘅一個理由就係：「你地唔反中亂港，唔背叛祖國，行得正，企得正，駛乜驚廿三條呀？」最近又聽到有人講：「你自己行得正，企得正，又駛乜驚人影相爆料呀？」似曾相識噃！

PermaLink: https://articles.zkiz.com/?id=31639
Next Page
ZKIZ Archives @ 2019