ZKIZ Archives


賓架嫁女 左丁山

2012-2-19  AD

大賓架 C嫁女,低調進行,設宴第一日舉行婚禮,招待家人親戚,第二晚就在香港會設宴,款待校友、財經界老朋友,約莫有二十席,全場氣氛溫馨,賓主盡歡。曾特首夫 婦剛好與左丁山背對背而坐,左丁山首先與佢握手,佢笑容可掬,態度認真輕鬆,梗係啦,就快唔駛煩,留番俾唐梁是但一個去捱,諗吓都開心。見到佢就醒起《亞 洲週刊》有陳婉瑩一篇文章,大讚曾先生在 Davos世界經濟論壇發言技驚四座,在場人士大力鼓掌,可說為亞洲人爭番一口氣(因為日本人照稿宣讀,全場保持寧靜),不少出席論壇之中國企業代表話: 「想唔到曾先生講英語這麼厲害!」陳婉瑩對曾特首素來彈多過讚,一定唔係佢嘅粉絲,但聽完發言之後,竟然講到中國在七月一日後可以委任曾先生為出席世界財 經會議之中國代表喎。
境外聲望高,境內民望低,曾特首唔知會唔會嘆一聲香港人要求太高,還是香港人太着重政治上芝麻綠豆之八卦小事,對國際大事不 懂,根本沒興趣?點都好啦,美國競選有句名言: politics is always local,競選成敗絕少決定於候選人對國際外交政治之認識,而係取決於有冇工做,失業率有幾高以及醫療保險費是否太貴,當然仲有大量黑材料,候選人互揭 醜聞,傳媒挖掘三十年前「臭史」等等,情況比香港激烈得多,唐梁之爭與之比較,小兒科啦。
金融財經界人士大多挺唐,賓架 C本人話要保持中立,不評論任何政治人物啫,佢啲賓客有言論自由,在雞尾酒時間,幾乎係三句不離聽到挺唐之言,不過左丁山咁啱站在挺梁大將之旁,梗係醒目,唔講政治,只講是晚之 05年紅酒好飲啦!
此 晚碰上新城財經台有開台十一年之慶,在萬豪酒店擺下雄才宴,筵開數十席,左丁山分身乏術,只得老早走去萬豪參加酒會,企足一個鐘頭咁滯,然後再行去香港 會,再企成個鐘頭先至可以坐低,好彩仍然未腳軟,無耐就見賓架 M趕到,原來佢又係從萬豪趕番過嚟嘅,賓架 M話唔係唔俾面 B姐,不過賓架 C嫁女,點都要到場祝賀㗎啦,回頭一望, B姐之老闆在座,中環世界真細小。

PermaLink: https://articles.zkiz.com/?id=31338

Next Page

ZKIZ Archives @ 2019