行業式微 租碟舖明年執笠
1 :
GS(14)@2016-10-17 08:07:41曾成巷成市的影音租碟舖，現已寥寥可數，仍經營租碟舖的黃錦安，多年前曾有6間連鎖店，現僅餘下一間，保留業務只因情意結，「下年應該摺埋架喇」。
《無間道》曾入貨幾百隻出租
當年影音租碟舖被喻為懶人行業，「好簡單架咋，租舖、買碟、請個店員，每個月有錢收」。黃錦安說，高峯時期財源滾滾，店舖遍佈港九新界，當年每舖日租300至400隻碟，翹埋雙手等收錢，《少林足球》、《無間道》出碟，更是香港租碟業另一個高峯，「我哋每套片，一口氣入咗幾百隻租出去」！不過時代變遷，寬頻、串流、機頂盒流行，不再需要租影碟看電影，「你可以上網睇，買機頂盒睇，香港未出DVD嘅片都已經睇到，好舊嘅片亦睇到，仲要高清質素，連TVB都唔夠呢啲多媒體鬥啦」。2008年《版權條例》通過，更是租碟舖行業衰敗的轉捩點，因為業界需要購入較昂貴的租賃版本，才能租出，「發行商唔支持租碟業發展，希望直銷賺多啲，但唔成功，而家HMV連手袋、玩具都要賣」。黃錦安的租碟舖餘下長沙灣元州街一間，不過只有兩成面積從事租碟，仍可日租20至30隻，至於其餘店面已轉型賣潮流玩具、零食、衣服。「現租碟業務仲有賺，因為有啲中佬，年紀大咗，有錢咗，但唔識上網或者用機頂盒」。黃錦安預期一年過後，會將餘下店面摺埋，「做生意係講經濟價值，租碟業無價值就唔好做」。
來源:
http://hk.apple.nextmedia.com/financeestate/art/20161017/19803267