有話兒：社會沒公義沒平等盧冠廷再唱心聲
1 :
GS(14)@2016-03-11 13:31:42「如今夜了 請安息輕帶着靈魂別去」89年，盧冠廷為六四事件作歌《漆黑將不再面對》祭亡靈，今年，盧冠廷將於6月踏紅館開騷，27年過去了，他覺得社會沒變，依然是沒公義沒平等，但他仍在考慮會否唱這歌：「我個心一直冇變，但我冇咗嗰種為自由嘅熱血，而家幾十歲人睇化咗！」他為現今社會撕裂感傷心，希望港人不再有擔憂爭拗，世事何曾是絕對！撰文：余燕儀現年65歲的盧冠廷回歸樂壇，相隔8年後，將於6月10及11日假紅館開騷，89年盧冠廷寫歌《漆黑將不再面對》悼六四亡靈，剛巧今次開騷踏正6月！日前盧冠廷在沙田接受本報專訪，被問到會否再唱這歌？他說：「嘩！好敏感喎，點處理呢個問題要考慮，就算我唔唱呢隻，我都會唱而家啲人感受乜嘢、呢個世界發生緊乜嘢，因為冇變呀，冇公義、冇平等，幾十年嚟冇變，有人一日就會有呢啲事情發生，我有機會唱嘅時候，一定會唱我心聲出嚟。」
■89年盧冠廷出席「民主歌聲獻中華」，其後更為六四事件創作了《漆黑將不再面對》。
■盧冠廷對香港人仍然有信心，相信定能找到出路。
「撕裂我係好傷心」
步入長者之齡，盧冠廷的心沒改變，但人卻看化了：「我個心一路都冇變，但係咪一定要唱呢隻歌呢？要考慮囉，嗱，我講我性格畀你聽先，任何有爭拗嘅嘢，唔理你對錯都好，一有爭拗我就行開，乜嘢叫啱？共產黨啱定係美國啱吖？呢個冇絕對，我會支持真普選，但我唔會去佔中。當年嘅感受全部係真，到而家係咪仲係為自由咁熱血？唔係喎大佬，我而家幾十歲，我冇咗嗰種熱血喎，個人又睇化咗，乜嘢啱乜嘢唔啱？呢個世界何來有絕對？」眼看現在的社會撕裂，盧冠廷坦言：「撕裂我係好傷心，我希望嚟睇我演唱會嘅人，有番兩個鐘頭嘅安慰，或者令佢哋暫時忘記紛爭，我希望香港人開心，唔使再擔憂爭拗，去番和平啲嘅社會，呢個係我希望。演唱會叫『Beyond Imagination』，希望可以感動人，我唔會放煙花着靚衫整到個台好靚，呢啲唔係我感動人嘅方法，我要去搵magic，超乎人想像嘅感覺。」
■盧冠廷前年為徐小鳳演唱會擔任嘉賓，已令人期待他再開個唱。
■財爺曾俊華在預算案引用《憑着愛》歌詞，令盧冠廷十分興奮。
「有意志無人可阻」
對於財爺曾俊華在預算案引用《憑着愛》歌詞，盧冠廷笑說：「《憑着愛》我寫㗎，高興㗎，用我隻歌，咁多歌唔用。08年佢都有嚟睇我嘅演唱會，佢喺街見到我都問幾時再開第二次？大家食過一次飯，講吓jazz音樂。」問是否相信香港人真的會搵到出路？他說：「香港人搵到呢個出路，有意志係冇人可以阻撓，我成日都講，飛機未識飛時，你相信佢就一定飛得起，一樣道理。」場地：香港沙田萬怡酒店
The Starving Of SudanKevin Carter1994
為一張相創作新歌
盧冠廷將出新碟收錄2首新歌，一首是《憑着愛》的延續篇《你今天快樂嗎》，另一首是潘源良填詞的《Kumbaya》，他說：「《Kumbaya》係睇幅相有感而發，非洲小朋友趴喺地爬，仲有半里到有嘢食地方，但佢冇力，有隻禿鷹喺隔籬望住，等佢瓜老襯就食佢！嗰個記者好勁，識影張相震撼世界，但點解唔去幫佢呢？呢個對我震撼好大，點解會搞成咁？因為我哋斬晒啲樹，沙漠化種唔到食物出嚟，呢個係我用嚟警世嘅歌。」問到近年還有聽廣東歌嗎？他坦言：「老老實實係冇嘅，我樣樣音樂都聽，廣東歌未去到一個level令我興奮，而家啲歌唔好聽，冇咗創作能力，因為90年代初rap出咗嚟，完全係廢咗旋律嘅重要性，第二computer music出咗嚟，唔識音樂都可以做作曲家，啲歌係垃圾，我同唱片公司講，希望畀番人聽歌嘅興奮。廣東歌一定重要，我希望廣東歌好似韓國咁可以打出世界市場，呢個係我希望。」
來源:
http://hk.apple.nextmedia.com/entertainment/art/20160311/19524452