ZKIZ Archives


岑敖暉遺憾令佔領者感挫敗

1 : GS(14)@2016-09-28 04:51:33

【本報訊】傘運過後,背負群眾期望的雙學領袖從高處摔下來,遍體鱗傷。回望兩年前佔領區人海,時任學聯副秘書長岑敖暉欲言又止,「最大挫敗,係令到好多人覺得好挫敗」。


陷低谷逾年 自信消散

「好多人將全副心機、精神擺喺呢場運動,好多人辭咗工或者付出好多代價,因為佢哋覺得今次一定要贏」,然而政府沒絲毫退讓,「最令我遺憾嘅事,係有好多呢啲挫敗出現」。岑對此充滿自責,「當初要令到人覺得呢件事好逼切,啲『修辭』就會出現:『我哋一定要點點點』、『係最後機會』,但係你可能深知未必可以one-off就促進社會變革」,「可能基於目光短視,(雙學)用一啲修辭,令人覺得今次爭取唔到就係大家嘅失敗,好令人惋惜」。假使重來,他依然糾結,「如果唔用呢啲『修辭』,(佔領)仲會唔會出現?唔知道」。岑敖暉等了一年多才走出低谷,昔日自信現已消散,回應問題前往往陷入沉思,「已經冇咗當初覺得要做一樣嘢就要去嘅感覺,覺得啱就啱、錯就錯,嗰種simplicity冇咗……唔會再覺得啲嘢係咁簡單同埋二元」。傘後網上瀰漫不信任和被背叛情緒,「最初對所謂本土好反感,總之凡是左膠就是錯的;但係慢慢發覺,所謂左膠都進入咗呢種二元思維」。此等氣氛在新東補選尤其明顯,「有自覺喺比較進步光譜嘅人,會uncritically支持AY(楊岳橋);唔係去理解梁天琦講緊乜,而係可能捉佢一兩句,去否定晒佢成個人」。掙脫二元思維過程中,他對網上攻擊漸坦然,「理解複雜咗,就唔會咁簡單去定性佢係我嘅敵人」。岑在立會選舉為朱凱廸助選,對其表現刮目相看,「要帶出討論,唔係一下子否定人哋,佢唔會咁樣對黃俊傑或鄭松泰,唔係唔認同你就要打沉你」。傘運無疑改寫港人政治參與模式,中學生自發成立本土關注組正是轉變的體現,「以前有條方程式、時間表,某程度係北京定,而家無論支持港獨、民主自決都係主張擺脫《基本法》,冇人會再話你聽條路點行」。■記者白琳




來源: http://hk.apple.nextmedia.com/news/art/20160928/19784322
PermaLink: https://articles.zkiz.com/?id=310345

Next Page

ZKIZ Archives @ 2019