大戶投資妖股必勝法 高仁
1 :
GS(14)@2016-09-07 22:22:432016-09-05 HJ
上文提要：妖股往往會被投資者貼上負面標籤，但高仁經過與「豬朋狗友」在飯局中研究，各位「巴打」只要投資有法，也可以跟機構投資者一樣，在妖股中搵食。
「高仁指點」話你知，機構投資者買入妖股CB（編按︰Convertible Bond 即可轉換公司債券），除了可能是有機制可以調低換股價之外，也可能因發行CB時訂明大股東需要借貨，使到機構投資者幾乎達致必勝。
在披露對話實錄之前，請各位「巴打」與「絲打」重溫人物背景，簡介如下：
程更計──本地證券行經紀兼財務顧問，除了招呼散戶之外，亦向上市公司出謀獻計；
沈繼司──核數師，熟悉會計制度、對數字敏感，但對外面世界一無所知；
施友化──擁有公司私有化經驗的前「唉賓架」，為人醒目，被看中轉型為上市公司CFO。
高 仁：如果買入CB嘅機構投資者夠多嘅話，最終股價可能喺一個價格範圍內上落，令到妖股幾乎動彈不得。如果散戶跟住玩range trading，可能都有得執吓。
施友化：有啲CB嘅structure仲可以有price reset， 即係可以將換股價調低，例如由5.2元調低至4.5元，機構投資者做咗沽空就會即時有利潤。
程更計：呢個trading strategy正！但我唔明白點解機構投資者一定借到貨囉？
高 仁：阿程，你真係太天真、太儍了。妖股發行CB嘅時候，已經訂明咗大股東係需要借貨出嚟，可能係一啲CFO（尤其之前審計出身嘅）功力唔夠。
施友化：妖股大股東係有成本，所以CB孳息一定要低才划算。
程更計：哈哈！即係大股東借貨畀人沽自己隻股票， 但係可能連大股東或者CFO都唔知道，原來發行CB加借貨嘅內情會係咁樣。簡單嚟講，妖股自己插自己。
高 仁：其實，呢種方法就係機構投資者稱之為CB arbitrage strategy（CB套戥策略）。
沈繼司：呢種情況咪好似蝙蝠俠利用超人剋星氪石去對付超人，可以能夠令到超人變得非常虛弱，兼且暫時失去所有超能力。
程更計：我就覺得似唐三藏向孫悟空施予緊箍圈，可以乖乖制服孫悟空。
高 仁：（忽然金庸「粉絲」上身）我會想起當年任我行被東方不敗鎖住嘅粗大鐵鏈，一鎖就將任我行鎖住喺地底十幾年。
施友化：不過，事件又唔可以一概而論嘅。對於一啲財務健全、有基本面、成交量夠大嘅公司， 只要大股東冇大手抵押股票，發行CB數目唔大都可以係好事嘅。
高 仁：施友化果然「零舍不同」，只要CB換股價夠高，例如溢價兩成至三成，孳息率要低，股份有成交量，即使可以向大股東借貨沽空，只要大股東沒有重倉孖展，都可以算係合理地發行CB【表】。
沈繼司：最後要提醒大家，上市公司發行CB，始終要小心有mark-to-market loss嘅風險。
程更計：妖！走開啦！
妖股投資系列之二
本欄逢周一刊出。
歡迎交流上市公司的財技個案及招數，請電郵至
[email protected]。
#高仁 #財經拆局 #財圈識真假 - 大戶投資妖股必勝法