ZKIZ Archives


教師教答案 左丁山

2012-1-20  AD

最近香港第一屆中學文憑試考生參加模擬考試,報紙多加報道。據報經濟科有二萬二千名考生報考,係一科熱門科 目,考題之中,有啲係時事題,以時事考驗考生對經濟學概念之理解能力。有一條問及本港教科書價與市場供求關係,要求學生提出根據市場理論,分辨本港教科書 係邊一種市場結構。
「明報」訪問一位經濟科韓老師,老師解釋:「本港有數家市場影響力的出版商,具控制書價的能力,屬寡頭壟斷( oligopoly),若考生對現況一無所知,以為教科書市場競爭機會均等,很可能誤以為是壟斷性競爭 monopolislic competition,因而答錯題目而失分。」
記者問呢條問題嘅標準答案,其實最好問林本利,林教授出版過高中經濟科教科書,對教科書市場有一 手經驗體會,勝於一般紙上談兵嘅老師。呢位韓老師驚住學生答錯而失分,老實講,左丁山就驚住佢教錯學生而令學生答錯題。香港教科書市場以前(九七前)有幾 十間出版商向教育局匯報書價,去年只剩番大約十七家書商報價,意味呢行難撈,不少書商已退出市場,但仍有十幾家噃,唔係幾家,明明合乎書本上之「壟斷性競 爭」之定義,點解韓老師話係「寡頭壟斷」?一般嚟講,「壟斷性競爭」係世界市場常態(牙膏,汽水,床單,維他命丸,健康產品,食米,無一不是),完美競爭 ( perfect competition)只存在於經濟學理論,作為競爭最高境界。「壟斷性競爭」有幾個特點:(一)產品差異,(二)多家廠商,(三)長期來講,市場無進 出障礙,(四)廠商獨立決策,(五)買家與賣家無(完全)資訊,(六)某些廠商有制定價格能力。

 

睇勻晒,本港教科書市場結構唔係「壟斷性競爭」?難諗啲喎!韓老師可能憑佢嘅教師選買經濟 教科書嘅經驗,知道有幾家出版商有市場影響力(如上述第六項 Market Power)都唔定。不可不知,香港學校買書之時,以往要求出版商送埋教材及教師用書、試題庫等等,而教師嗰份由學生家長付鈔(自去年學年開始前,教育局 明令唔准,但學校冇錢買教材),呢項出版書之額外成本,唔知教師有無講清楚俾學生聽呢?

PermaLink: https://articles.zkiz.com/?id=30709

Next Page

ZKIZ Archives @ 2019