📖 ZKIZ Archives

豬肉減價 左丁山

http://hk.apple.nextmedia.com/template/apple_sub/art_main.php?&iss_id=20120113&sec_id=12187389&art_id=15977980&cat_id=255&coln_id=22

上星期，沙田陳太話街市豬肉貴過超市豬肉，好多師奶湧去超市買豬肉，關於街市行情呢回事，啲師奶及退休女士最熟行，朝頭早在公園打太極嘅婆婆，亦係消息靈 光之輩，佢地打完太極就去飲早茶，知道邊間街坊酒樓唔夠人（一間在九時前，阿婆自己斟茶，因女工未返，有咗最低工資之後，酒樓要女工早上遲啲返工），邊個 街市邊樣餸菜最便宜，沙田陳太都係要久唔久從阿婆方面攞消息，但佢未必一定照做噃；事實上，消費呢回事，豐儉由人，大埔街市有一檔專係留番啲最靚嘅豬肉俾 佢，價錢係貴呀，陳太話最緊要好食喎。
現在期貨市場好似已無豬肉期貨，上次參加泰國 A嫁女婚宴，在座有「奇聞 T」在，奇聞 T原來已轉營罐頭鮑魚，有新方法炮製，可惜佢邀請左丁山試食之日，左丁山有事唔得閒去。與佢從罐頭鮑講到豬肉及豬腩肉，奇聞 T大笑：「泰國 A在雷曼之時，我做緊期貨經紀，炒豬腩（ Pork Belly）炒到發癲，現在回想起來，輸唔死算夠運！」炒豬腩之幼稚園級知識就係 Hog Cycle（毛豬循環）。養豬並不是太空高科技，去年年中豬肉價格飛升，推高中國通脹率之時，溫家寶就講過豬價幾個月後就會回落，原因就係豬農見到價錢 高，立即養多好多豬，幾個月後，大量新增供應推出市場，豬價自然回落，一路跌至「豬賤傷農」，豬場減少養豬，幾個月後豬價又會回升。
現在正值「毛 豬循環」嘅價格下降期，批發價由去年初每擔 1237元升至七月最高 1676元，十二月跌至 1425元（蘋果日報一月九日），自高峯回落 15%，既然如此，超市降低豬肉售價，有何不可？豬販唔減價，超市又唔減價嘅話，豈非合謀抬價？正是官字兩個口，超市唔減價，官方話根據「競爭法」（好彩 尚未成事）可調查壟斷性抬價，到超市減價嘞，官方又話競爭法有「掠奪性價格」條款，可以調查超市點解減價，市民真係得啖笑。記得「蘋果」創立之時，每份賣 兩蚊，同樣俾人指控係「掠奪性價格」圖謀以本傷人，壟斷市場。蘋果日報成立 17年嘞，今日報業競爭之激烈，空前未有，免費報紙周街派，誰人可以壟斷？試想當年已有競爭法嘅話，政府會點樣對付「蘋果」？

PermaLink: https://articles.zkiz.com/?id=30567
Next Page
ZKIZ Archives @ 2019