📖 ZKIZ Archives

要發電還是減排 左丁山

2012-01-07  AD

世界氣候會議上個月在南非德班舉行，各國代表爭論不休，毫無成果，最後達成協議話延長「京都議定書」，但各國代表返國後，加拿大立即宣佈退出協議，不參加「京都議定書」，原因係乜？就是加拿大認為經濟犧牲太大，損害加國之石油能源利益。
啲 氣候會議通常要求各國減少碳排放，將每年排放總量回復到二十世紀九十年代，西歐國家對此最為堅持，今年一月一日開始更向全球航空公司徵收碳排稅（如飛過聯 盟上空嘅話）。有人話興建新機場，擴建新跑道係舊經濟思維，落後發展觀，係以西方富裕國家，富裕人民之角度嚟分析事物嘅。西歐人民已經樣樣有，生活不愁， 歐債危機未殺到埋身之前，國家破產之前，當地人士重視現存居住生活環境，反對新基建，反對新增排放，乃人之常情。左丁山攞緊年薪十萬元之時，想話跳槽博加 薪，大老闆（美國人）召見，勸左丁山唔好辭工，之後佢嘅上司（德國人，東亞區主管）又召見，德國人話：「一個人唔駛要咁多錢嘅，最緊要有工作滿足感，有上 進心，我一年一百萬元使唔晒，唔好只係追求慾望呀，你留番喺度有大把前途。」呢位老闆當時好似住在地利根德閣，有司機公司車，有女傭，子女讀國際學校，全 部費用銀行支付，而左丁山仲係租村屋住，正在儲蓄買樓首期，聽完心裏「挑挑聲」，之後就遞辭職信。
歐洲國家就是如此教訓其他發展中國家，加拿大唔制，美國唔睬，日本唔答應，要兩大排放國中國與印度應承呀？咪搵笨！
「華 爾街日報」（一月三日）報導，印度陷入供電不足危機，印度人均用電量係世界最低嘅，每年只用 778.71kwh（度電），三億人民無電力供應，不少地區實施發電、電網分拆制（即發電由生產商負責，輸電由獨立電網負責），但為咗討好農民與選民，印 度政府豈止不准國有輸電公司加電費，直情命令有輸電網公司免費向農民供電，令到國有輸電公司陷入破產邊緣，無力向產電公司買電，產電公司自然亦唔會擴建發 電設施（香港人身在福中，只會大罵電力公司加價），於是全國嚴重缺乏電力，印度政府興建核電站不成（反核示威），興建水力發電不成（環保人士抗議），唯有 拚命用焦煤發電，故此歐盟叫印度減排？有錢佬唔好玩嘢啦。


PermaLink: https://articles.zkiz.com/?id=30449
Next Page
ZKIZ Archives @ 2019