萬南 二五中環 「振英」闖立會 仲自動當選？
1 :
GS(14)@2016-07-24 17:17:06http://www.metrohk.com.hk/index.php?cmd=detail&id=314803&search=1
呢個欄向來少講政治，主力講金融圈八卦事，但適逢立法會選舉報名期，請容萬南講吓某幾個同金融相關嘅功能組別。首先係金融界，現任議員星爺吳亮星表現麻麻，99巴仙唔尋求連任，由於呢個界別係公司票，據聞協調派中銀香港嘅公司秘書陳振英參選，仲好大機會自動當選喎。
至於代表股佬多嘅金融服務界，現任議員肥佬張華峰應會再砌多一屆，雖然都係行公司票，但C組券商眾多，所以向來有競爭性，尤其舊年大時代之後，好多莊家及有銀仕狂開新證券商，暗手掌握好多票，缸湖傳聞有人近期頻頻拜票，準備報名惡鬥肥佬張，令上屆只險勝6票嘅肥佬有好大壓力。
至於會計界比較簡單，肯肯定Kenneth贏。點解？因為爭取連任嘅梁繼昌，以及已經報名參選嘅陳弘毅(同法律學者同名)，英文名都叫Kenneth。講完爛gag，認真嗰句係陳生喺業界唔多人識，本來非常輸蝕，但盛傳西環非常撐佢，更早喺陳生未宣布去馬之前，已主動向「4大」及「10大」打招呼，或明或暗希望一眾拍檔幫吓手叫夥計支持。會計佬數口精當然識do做信鴿，不過會計界行個人票，相對地有個人意志，高人話要揮低梁繼昌唔容易囉。