財路：澳門賭業收益勁 賭股急彈
1 :
GS(14)@2016-07-14 08:08:02澳博（880）跌到落三年底，家陣PB，比起本身歷史平均PB，平咗70%之餘，喺同樣大級數濠賭股當中，澳博PB至平至抵搞。澳博現價4.75元，比2013年27蚊高位，累跌咗82%，市值得番268億元，場內銀娛（027）家陣1,027億元市值，近澳博3.9倍！澳博呢個三年海底價嘅今年預估PB，得1.1倍，比起本身上市以嚟平均歷3.8倍PB，平咗70%。場內同樣有牌頭濠賭股，永利澳門（1128）專業預估今年12.7倍PB、金沙中國（1928）同美高梅中國（2282），同樣喺5倍樓上，上邊銀娛，亦講緊2.3倍PB，澳博PB，比起最近磅銀娛，亦講緊平咗一半。而彭博綜合環球同業平均3.4倍PB，澳博又係平咗大大截！又瑞銀發報告，話今個月頭10日，澳門賭業收益勁，賭檯日均收益達到6億元，而6月份時，日均收益得4.8億元，估計澳門賭業第三季回復正增長。有大行睇好澳門賭業turnaround，加埋暑假效應，場內賭股呢期急彈，當中，新濠（200）由上周五到家陣，最高累升12%，就連上邊市值晒士咁大隻嘅銀娛，由6號以嚟，亦累升咗11%。澳博又點？本周暫時最低見8號4.49元，到噚日最高位4.78元計，都係累升6.5%咁大把，澳博呢轉落後！呢轉兜澳博，短打買落後，睇Bernstein俾澳博5.75元目標價，澳博講緊要升21%。又中線少少，博澳門賭業好似大行睇翻身，澳博翻半番到7蚊，今年預估PB先去到1.5倍，仍然係同級行家中，至抵搞！錢雋細價股專家本欄逢周二、四刊出
來源:
http://hk.apple.nextmedia.com/financeestate/art/20160714/19693692