大家傾吓：上天的安排（二）
1 :
GS(14)@2016-05-21 13:38:14上文提到，上天常常幫我度過難關，令我逢凶化吉，但香港大學建築系畢業後，上天對我又有新安排。我剛出社會做工不久，就成日想發達，從商經驗是零卻膽粗粗學人做生意，但手頭無資金，就向老友及死黨共3人，每人借5萬元共15萬元想開食肆，入則建築署及消防處攞批文，搞咗幾個月，消防處卻因閣樓走火問題否決選址作餐館用途，不發批文。但當時我已畀了定金，上期及幾個月租金，又買了部份生財工具，借老死的資金幾乎花光但卻得個吉，老死都是剛剛畢業，全部窮光蛋，非常有義氣地用他們個人名義向銀行貸款再借給我，我無論如何都要代他們還錢給銀行。當時月薪大概是7,000元，還了銀行錢就只餘下約1,500元為交通費、飯錢、衣服費、拍拖費及其餘生活費，日子非常難過，但自作孽，不能怪任何人，還錢那段時間約兩年，為了省錢，中午飯盒、晚餐自煮，朋友仔約出街都唔敢去，只能出糧時提升飯盒質量到四寶飯（加多隻鹹蛋），我多謝當時的女朋友（現在的老婆大人）陪我捱，若換了今天港女，走咗十世兼留言facebook恥笑，那兩年雖然辛苦，但總有份糧出可以還債。1982年，戴卓爾夫人在北京人民大會堂跌倒，令香港的樓市大跌，則樓生意也大受影響，一天老闆對我說：「Donald，許多clients的項目暫停，公司收入都有問題，唔好意思，你可以開始搵新工！」嘩！晴天霹靂，第一反應就是「死啦！冇咗份工，點還錢給老死！點對得住佢哋！」當晚放工，行到中環置地廣場，適逢聖誕節左右，我在一樓向下望，見到許多型男型女都在shopping買禮物，一片歡樂氣氛，我就俾人炒魷魚，精神委靡，衣履不整，老死罵我的幻象不斷地浮現，越諗越驚，手腳乏力，視力模糊，想暈，幾經辛苦，終於回到家，縮入被窩發抖，難關當前，既冇朋友可借錢，自己屋企經濟又唔係好，當時又唔興財務公司，冇理由厚面皮到問女朋友借㗎。我非常後悔當初草率的決定，冇周詳計劃，以為讀完建築就天下無敵，殊不知現實的建築物條例和大學天馬行空的設計完全是兩回事，冇認識清楚食肆走火的規定就亂上馬，害到自己及老友，當時找新工並不容易，如是者每天如喪屍般返工放工，冇表情，冇心情，冇咗份工，莫講話要還債，連最基本的衣食住行都馬上有問題，捫心自問讀建築系的5年期間，除了抄襲事件外，所有assignment都廢寢忘餐認真去做，捱足5年，從一年班55個同學，到5年班一次過畢到業只有15個同學（我是其中一個），箇中辛酸，外人絕不能理解，畢業後以為前路一片光明，希望有一番作為，點知出社會做事後一下子就出事，心想「上天，你次次放過我，今次點解要整我」。待續范統
mailto:
[email protected]
來源:
http://hk.apple.nextmedia.com/financeestate/art/20160519/19618083