2011-12-08 AD
唐英年與葉劉淑儀、梁振英出席公務員論壇，蘋果日報大字標題：唐英年敗走。敗走有好多重意思，譬如講錯嘢，觀點不受公務員歡迎，飲醉酒亂咁噏等等，照睇報 道，原來葉劉問唐會唔會保證以後不因短期經濟波動而削減公務員人工，唐答不會保證，引起在場公務員喝倒采！而葉劉及梁振英就好精乖，聲明：以後唔會因短期 波動而減公務員人工，葉梁兩人因此博得全場掌聲，而唐則遭葉太及其支持者圍攻。
唐英年究竟點講？據蘋果記者報導：「我唔可以咁承諾，因為政府做事一定要同市民相約，例如全港喺沙士期間，基本上所有人都減薪，如果公務員好超然，完全同市民脫節，市民對政府印象同支持會大大削弱。」記者又寫，部份在場人士鼓掌。
其 實如果左丁山在場，都會就此對答向唐生拍掌，欣賞佢夠 guts講真話，葉太與梁生兩人精靈到極，知道公務員鍾意乜嘢答案，就照背答案，討好公務員，自然獲得大量掌聲。葉梁兩人如做咗特首，好危險，香港容乜易 步上希臘西班牙後塵？為何公務員不能減人工？總體經濟困難時期，香港因有聯繫匯率，動彈不得，要調低成本嘅話，必須削減人工或失業率上升，回歸頭七年，情 況正是如此。葉太與梁生唔好話佢地唔知、唔識。要記住，因聯繫匯率之神聖不可侵犯，任何本港之總體成本下調，以恢復競爭力，一定係透過失業率上升與削減工 資來達成嘅，公務員萬萬不能睇住別人減薪而自己不減，邊一位仁兄仁姐做特首，都要明白呢個經濟及政治道理。
個個話唐英年唔識講嘢，佢講真話就俾公 務員圍攻，報紙話佢「敗走公務員論壇」，啲公務員與起標題嘅編輯，都係反智。我地在 2012年冇投票權選特首，到 2017年就可以，但如果「民智不開」，一味政治八卦化，有投票權都冇用啦。唐英年唔知出自真情還是公關教路，拒絕保證公僕不減薪，總之係有原則，有立 場，與佢相比，葉太與梁生未免太過精甩辮咯！